Humarap si Pangulong Ferdinand Marcos Jr. sa publiko upang patunayan na hindi niya hinahayaan ang lumalaking galit at pagkadismaya ng mga Pilipino sa flood control scandal, ang itinuturing ngayon bilang pinakamalaking eskandalo ng korapsyon sa modernong kasaysayan ng bansa. Ayon sa Pangulo, malinaw at matatag ang panindigan ng administrasyon: may pananagutan ang lahat ng sangkot, at walang makakalusot.
“Magtiwala po kayo sa Ombudsman. Alam nila ang ginagawa nila, at gagamitin nila ang buong kapangyarihan para papanagutin ang lahat ng sangkot. Kung hindi man agad makulong, sisiguraduhin naming mananagot ang bawat isa sa flood control scandal.” -Pangulong Ferdinand Marcos Jr.
Ayon kay Marcos, dapat umanong magtiwala ang taumbayan sa Office of the Ombudsman, dahil ito ang institusyon na may legal na kapangyarihang mag-imbestiga, magsampa ng kaso, at magpataw ng parusa. Idiniin niya na alam ng Ombudsman ang ginagawa nila, at hindi raw ito isang ahensyang marupok o madaling impluwensyahan.
Dagdag pa ng Pangulo, hindi raw dapat magpadala sa haka-haka, ingay, o politikanang naglalayong sirain ang proseso. Ang mahalaga ay ang resulta at ang resulta raw ay paparating na. Malinaw sa kanyang mensahe na ang Ombudsman ang magtatapos sa imbestigasyong ito, hindi ang politika, hindi ang tsismis, at lalong hindi ang mga nagtatangkang ilihis ang usapan.
Sa pagharap ni Pangulong Marcos sa isyu, isa lamang ang malinaw: hindi niya balak takbuhan ang kontrobersiya. Sa halip, ipinasa niya ang tiwala sa Ombudsman, isang sangay na may tunay na kapangyarihang magdala ng hustisya.
Walang komento:
Mag-post ng isang Komento