Mariing binatikos ni Senador Loren Legarda ang Dolomite Beach project sa Manila Bay na inilunsad sa ilalim ng administrasyon ni dating Pangulong Rodrigo Duterte, na aniya ay “walang kuwentang proyekto” at hindi nakatutulong sa totoong pangangailangan ng mga mamamayan.
Sa isang sesyon sa Senado, diretsahang sinabi ni Legarda na hindi niya kailanman nakita ang halaga ng Dolomite Beach, lalo na’t lumalabas ngayon na ito ay isa pa sa mga posibleng dahilan ng matinding pagbaha sa Maynila, ayon sa ulat ng Metropolitan Manila Development Authority (MMDA).
“Simula pa nang ginawa ‘yung dolomite ay hindi ko nakikita kung anong kahalagahan ‘yan. Bakit natin gusto magka-white sand beach diyan? ‘Yan naman ay artificial at hindi dapat nilipat mula sa Kabisayaan hanggang sa Manila Bay,” pahayag ng senadora.
Dagdag pa niya, sang-ayon siya sa ideya ng pagpapaganda ng paligid (beautification), ngunit ito ay dapat nakabatay sa siyensya at tamang urban planning.
“Ako sang-ayon sa beautification, okay. Pero ang beautification na ayon sa siyensya. Pero hindi dapat ‘yan ginawa. Pero ‘yan ay isang tuldok lang sa maraming kababalaghan at hindi dapat ginagawa,” dagdag ni Legarda.
Ayon sa MMDA, tatlong pangunahing drainage outfalls ang isinara upang maitayo ang Dolomite Beach kabilang dito ang Faura, Remedios, at Estero San Antonio Abad. Dahil dito, napilitan umano ang tubig-ulan na dumaan sa sewerage treatment plant na walang sapat na kapasidad tuwing bumubuhos ang ulan, kaya’t lalong lumalala ang pagbaha sa Taft Avenue at mga kalapit na lugar.
Ang Dolomite Beach, na sinimulan noong 2020 at binuksan sa publiko noong 2022, ay nagkakahalaga ng ₱389 milyon. Ngunit hanggang ngayon, marami ang naniniwala na mas napunta ito sa pagpapaganda sa halip na sa totoong solusyon sa polusyon, basura, at pagbaha.
Ang paninindigan ni Sen. Loren Legarda laban sa Dolomite Beach ay nagpapakita ng panawagan para sa mas responsableng paggamit ng pondo ng bayan. Sa panahon kung saan lumalala ang mga isyu sa klima at polusyon, mahalagang ituon ang atensyon sa mga proyektong may pangmatagalang solusyon, hindi sa mga pansamantalang palabas.
Walang komento:
Mag-post ng isang Komento