Inutusan ng administrasyong Marcos ang agarang imbestigasyon hinggil sa sunog na naganap sa gusali ng Department of Public Works and Highways (DPWH) sa Quezon City. Ayon sa paunang pahayag ng Malacañang, nais ng pamahalaan na matukoy kung ang insidente ay isang aksidente o sinadyang pagsunog na posibleng may layuning sirain ang mahahalagang ebidensya kaugnay ng kontrobersyal na flood control projects ng ahensya.
"Hindi natin palalampasin ang ganitong insidente. Ang katotohanan ay hindi dapat masunog kasama ng mga dokumento. Sisiguraduhin ng administrasyon na kung sino man ang may sala, mananagot sa batas"
Ayon sa opisyal na pahayag, “Ang administrasyon ay nag-utos ng agarang koordinasyon sa iba’t ibang ahensya ng gobyerno upang alamin ang tunay na dahilan ng sunog at tukuyin kung may naganap na panununog o sadyang ginawa ito,” pahayag ng Office of the President.
Samantala, tiniyak naman ng DPWH na walang anumang dokumentong may kinalaman sa kasalukuyang imbestigasyon sa flood control anomalies ang nasunog. Ayon sa kanila, ang Bureau of Research and Standards (BRS) building na tinupok ng apoy ay hindi naglalaman ng anumang papeles na may kaugnayan sa flood control projects na iniimbestigahan.
Gayunpaman, hindi pa rin maaalis ang hinala ng publiko na ang insidente ay maaaring isang uri ng sabotahe upang sirain ang mga dokumentong magpapatunay sa mga umano’y iregularidad. Marami ang nanawagan ng transparency at agarang resulta ng imbestigasyon upang matiyak na walang tinatago ang mga sangkot na opisyal.
Habang nagpapatuloy ang imbestigasyon, nananatiling tanong sa publiko kung ang sunog sa DPWH ay isang simpleng aksidente o isang sinadyang pagtatangka upang ilihim ang katiwalian. Ang hakbang ng administrasyong Marcos na agad mag-utos ng masusing imbestigasyon ay nagpapakita ng hangaring mapanagot ang sinumang responsable at maibalik ang tiwala ng mamamayan sa mga institusyon ng gobyerno.
Walang komento:
Mag-post ng isang Komento