Nahaharap ngayon sa kontrobersiya ang Journey frontman na si Arnel Pineda matapos maglabas ng warrant ang Quezon City Regional Trial Court (QC RTC) Branch 99 kaugnay ng kaso ng umano’y paglabag sa Anti-Violence Against Women and Their Children Act (RA 9262) na isinampa ng kanyang hiwalay nang asawa.
Ang kautusan ay inilabas ni Judge Mary Ann Punzalan-Toribio matapos ang ilang beses na hindi pagdalo ni Pineda sa mga itinakdang pagdinig. Itinakda ang kanyang piyansa sa ₱72,000, ngunit nang subukan siyang ihainan ng warrant noong Setyembre 12, hindi siya matagpuan dahil umano nasa United States pa rin siya.
Batay sa reklamo ng kanyang asawa, ilang taon umano siyang nakaranas ng verbal assault, manipulasyon, at coercive behavior mula kay Pineda, dahilan upang mapilitan siyang lisanin ang kanilang tahanan. Ang mag-asawa ay ikinasal noong 2008, ngunit umuugong ang mga alegasyon na lumala ang kanilang relasyon dahil sa paulit-ulit na umano’y pambababae ni Pineda.
Itinakda ang kanyang arraignment sa Setyembre 17, at mananatili ang bisa ng bench warrant kung muli siyang hindi sisipot sa korte.
Ayon sa mga abogado ni Pineda mula sa Chavez, Miranda and Aseoche Law Offices, ang hindi niya pagdalo ay dahil sa pagkaka-ospital at patuloy na mga dahilan medikal.
“The order issued by the RTC is a bench warrant. It is a procedural directive to secure attendance in court proceedings. This should not be confused with a warrant of arrest for the commission of a crime,” ayon sa kanilang pahayag.
Dagdag pa nila, ibinasura na ng Department of Justice (DOJ) ang VAWC case noong Setyembre 4 at iniutos na i-withdraw ang kaso. Nilinaw din nilang isinampa lamang ng asawa ni Pineda ang VAWC complaint matapos silang kasuhan ng dalawang bilang ng adultery.
Ang isyung kinahaharap ni Arnel Pineda ay nagbibigay-diin sa kahalagahan ng pagharap sa mga kaso sa tamang proseso at hindi sa publiko. Bagama’t iginiit ng kanyang kampo na ibinasura na ang kaso ng Department of Justice, may obligasyon pa rin siyang humarap sa korte upang maayos ang legal na proseso.
Walang komento:
Mag-post ng isang Komento