Sa gitna ng malalakas na ulan at matinding baha sa San Jose, Nueva Ecija, nagningning ang pangalan ni Alvin Jalasan Velasco bilang isang tunay na bayani. Si Alvin ay isang nurse, ambulance driver, at LDRRMO responder na kilala sa kanyang walang sawang paglilingkod at malasakit sa kapwa. Subalit, ang kanyang dedikasyon ay nauwi sa isang trahedya nang siya mismo ang nasawi habang nagsasagawa ng pagliligtas sa gitna ng baha.
“Ang misyon ko ay makapagsalba ng buhay, kahit kapalit ang akin. Kung may isa pang mabubuhay dahil sa akin, handa kong gawin iyon dahil ang bawat buhay ay mahalaga.” -Alvin
Sa kasagsagan ng malakas na bagyo at pagbaha, bahagi ng operasyon ng rescue team si Alvin upang mailigtas ang mga residenteng apektado ng kalamidad. Habang abala sila sa pagtulong, isa sa kanyang mga kasamahan ang natangay ng malakas na agos ng tubig.
Walang pag-aalinlangan, sumugod si Alvin upang sagipin ang kasama, mahigpit niya itong hinawakan upang mailigtas. Ngunit sa hindi inaasahang pangyayari, biglang lumakas ang ragasa ng tubig. Pareho silang inanod ng malakas na agos. Pinilit silang hilahin ng kanilang team gamit ang lubid, ngunit nagkabuhol-buhol ito, at sa isang iglap, sila ay tuluyang natangay ng agos at naglaho sa ilalim ng tubig.
Marami ang nagluksa sa pagpanaw ni Alvin, na hindi lamang kilala bilang isang dedikadong rescuer, kundi bilang isang mabuting asawa, mapagmahal na ama, at anak ng Zamboanga del Sur.
Ang kanyang kabayanihan ay magsisilbing inspirasyon sa marami isang paalala na ang tunay na bayani ay handang isakripisyo ang sariling buhay para sa kaligtasan ng iba.
Ang buhay at kabayanihan ni Alvin Jalasan Velasco ay patunay na ang tunay na pagseserbisyo ay hindi nasusukat sa titulo o tungkulin, kundi sa tapang at malasakit. Siya ay patunay na may mga taong handang magsakripisyo ng sarili para sa kapakanan ng iba, at ang kanyang alaala ay mananatili bilang inspirasyon sa bawat Pilipino.
Rest in paradise, Alvin isa kang bayani na hinding-hindi malilimutan.
Walang komento:
Mag-post ng isang Komento