Sa likod ng matinding hirap sa buhay, isang kabataan mula sa Quezon City ang patunay na ang pangarap ay walang pinipiling estado sa buhay. Si Cadet First Class Jessie Ticar Jr., 23 taong gulang mula sa Batasan Hills, ay gumawa ng kasaysayan bilang ika-apat na summa cum laude sa buong kasaysayan ng Philippine Military Academy (PMA). Hindi lamang siya class valedictorian ng PMA Bagong Sinag Class of 2025, kundi siya rin ang may pinakamataas na General Weighted Average (GWA) na 9.52% simula pa noong 1985.
“Lagi ko pong iniisip na kailangan kong magsumikap hindi lang para sa sarili ko, kundi para po sa mga magulang ko na todo kayod kahit hirap,” dagdag ni Jessie.
Si Jessie ay anak ng isang sidewalk vendor na nagtitinda ng ballpen at envelope sa labas ng Quezon City Hall. Ang kanyang ina ay walang puwesto at araw-araw ay nakabilad sa init at ulan upang makabenta. Samantala, ang kanyang ama ay dating taxi driver na na-stroke noong si Jessie ay nasa senior high school pa lamang.
“Gusto ko sanang patigilin si Mama sa pagtitinda dahil sa kanyang kalusugan, pero narealize ko, ito ang paalala kung paano kami nakasurvive,” ani Jessie sa panayam.
Sa kabila ng kanilang kahirapan, ginamit ni Jessie ang kakapusan bilang inspirasyon upang makapasok sa PMA. Laking pasalamat niya nang malaman niyang may stipend o allowance ang mga cadet. Kaya’t hindi lamang siya nag-aral, kundi isinusustento niya rin ang kanyang pamilya gamit ang natatanggap na allowance.
Bilang class valedictorian sa 266 cadets, tatanggap si Jessie ng siyam na awards, kabilang ang Presidential Saber, isang prestihiyosong gantimpala na ibinibigay sa pinakamahusay na kadete.
Ang kanyang tagumpay ay hindi lamang para sa sarili kundi para rin sa kanyang mga magulang na nagsakripisyo upang siya’y makapagtapos.
Ang tagumpay ni Jessie Ticar Jr. ay patunay na hindi hadlang ang kahirapan para makamit ang pangarap. Sa tulong ng tiyaga, respeto sa magulang, at matibay na pananampalataya sa sarili, nagtagumpay siya sa isang larangang inaakalang para lamang sa may kaya.
Ang kanyang kwento ay nagbibigay ng pag-asa sa bawat kabataang Pilipino na nagsusumikap sa gitna ng hamon ng buhay. Ang tagumpay niya ay tagumpay nating lahat.
“Hindi man ako lumaki sa marangyang buhay, pero pinalaki ako ng mga magulang kong may dangal, sipag, at determinasyon. Sa kanila ko iniaalay ang tagumpay na ito,” - Jessie Ticar Jr.
Walang komento:
Mag-post ng isang Komento