Hindi mapigilan ng aktor at dating PBA player na si Benjie Paras ang maging emosyonal nang magbigay siya ng paalala tungkol sa totoong yugto ng pagiging magulang ang oras na unti-unting lumalayo ang mga anak habang nagkakaroon na sila ng sariling buhay at mundo.
Ayon kay Benjie, natural daw ito sa bawat pamilya. Habang lumalaki ang mga anak, nagiging abala na sila sa kanilang trabaho, relasyon, o personal na layunin at hindi na tulad ng dati na lahat ng oras ay para sa magulang.
“Darating talaga ‘yung panahon na may kanya-kanya na silang mundo. Hindi na kagaya dati na bawat galaw nila, kasama ka. Masakit tanggapin pero ganyan talaga ang buhay,” ani Benjie Paras.
Dagdag pa ni Benjie, isa ito sa mga pinakamahirap na leksyon ng pagiging magulang ang matutong magpaubaya at magtiwala na kaya na ng mga anak tumayo sa sarili nilang mga paa.
“Noon, ako ‘yung takbuhan nila sa lahat ng bagay. Ngayon, minsan hindi na ako updated sa mga plano nila. Pero naiintindihan ko kasi ganun din naman tayo nung bata pa tayo,” dagdag pa niya.
Ayon kay Benjie, hindi dapat masamain ng mga magulang ang ganitong pagbabago. Sa halip, ito raw ay senyales na maayos nilang napalaki ang kanilang mga anak sapat para maging independent at may sariling desisyon sa buhay.
Maraming netizens ang naka-relate sa mensahe ni Benjie, lalo na ang mga magulang na unti-unti nang nasasanay sa “empty nest” phase ang panahong umaalis na ang mga anak sa bahay upang bumuo ng sarili nilang buhay.
“Hindi mo mapipigilan ang oras. Kaya habang bata pa sila, yakapin mo, kausapin mo, at iparamdam mong mahal mo sila. Kasi darating ang araw na bihira mo na silang makita, pero ang pagmamahal mo, dala-dala nila kahit saan sila magpunta,” ani Benjie sa isang panayam.
Ang mensahe ni Benjie Paras ay isang malalim at totoo na paalala sa lahat ng magulang na ang oras ay hindi maibabalik, at bahagi ng pagmamahal ay ang pagtanggap ng pagbabago.
Walang komento:
Mag-post ng isang Komento