Isang batang lalaki mula sa General Santos City ang nagpatulo ng luha ng netizens matapos siyang mag-apply bilang janitor sa isang opisina hindi para sa luho, kundi para lamang makabili ng gamit sa kanyang school project. Siya ay si Kervy James Villarejo, isang Grade 5 pupil na ngayon ay tinuturing na inspirasyon ng marami dahil sa kanyang sipag, tapang, at determinasyon sa buhay.
“Gusto ko lang po talagang makumpleto ‘yung project namin kasi ayokong pumalya sa school. Hindi ko po iniisip kung nakakahiya, ang mahalaga po ay makamit ko ang pangarap ko.” -Kervy
Ayon sa mga empleyado ng opisina, lumapit si Kervy sa kanila at nagtanong kung maaari siyang magwalis o mag-mop bilang kapalit ng kahit kaunting bayad. Ipinagtapat ng bata na gusto lamang niyang kumita para makabili ng kailangang materyales sa kanyang school project.
Naantig ang puso ng mga empleyado sa kasipagan at kababaang-loob ni Kervy. Sa halip na pagtrabahuin pa siya, binigyan na lamang nila ito ng pera upang mabili ang kanyang kailangan. Hindi rito natapos ang kuwento bumalik si Kervy kinabukasan upang ipakita ang natapos niyang project bilang pasasalamat.
Maraming netizens ang nagpahayag ng paghanga sa kanya at sinabing ang kanyang diskarte sa buhay ay patunay na kung may determinasyon, may paraan. May ilan ding nag-alok ng tulong sa pamilya ni Kervy matapos makita ang kanyang kuwento online.
Ang kuwento ni Kervy James Villarejo ay isang paalala na hindi kailangang maging malaki ang hakbang para makamit ang pangarap, ang mahalaga ay ang pagkilos. Sa murang edad, ipinakita niya na ang tunay na tagumpay ay bunga ng determinasyon, sipag, at kababaang-loob.
Walang komento:
Mag-post ng isang Komento