Sa panahon ngayon na puno ng pagsubok, stress, at kawalang-katiyakan, muling nagbigay ng makabuluhang paalala ang veteran comedian, writer, at TV icon na si Michael V o mas kilala bilang Bitoy. Sa kanyang panayam kamakailan, binalikan niya ang mga panahon sa kanyang buhay kung saan hindi agad niya nakamit ang mga pangarap ngunit pinatunayan niyang lahat ay may tamang panahon.
Ayon kay Bitoy, natural lang na minsan ay mainip o mawalan ng pag-asa kapag hindi agad dumarating ang mga bagay na inaasam. Pero paalala niya, ang tagumpay ay hindi minamadali.
“Hindi sa lahat ng oras makukuha natin ang mga gusto natin sa buhay, dadating yan sa tamang panahon. Ang importante, ‘wag tayong susuko sa buhay,” pahayag ni Michael V.
Bilang isa sa mga haligi ng Philippine entertainment industry, hindi lingid sa kaalaman ng publiko ang mga pinagdaanan ni Bitoy bago marating ang kanyang kasalukuyang tagumpay. Nagsimula siya bilang struggling artist, nag-audition sa iba’t ibang programa, at ilang beses ring nabigo ngunit hindi siya tumigil.
“Ang dami kong rejection noon. Pero lagi kong sinasabi sa sarili ko, baka hindi pa ngayon, baka bukas. Kapag hindi mo nakamit agad, hindi ibig sabihin na hindi para sa ‘yo. Baka gusto lang ni Lord na mas handa ka pag dumating na,” ani Bitoy.
Dagdag pa niya, sa panahon ngayon kung saan maraming kabataan ang nakararanas ng anxiety, burnout, at pressure dahil sa social media at instant success culture, mas kailangang ipaalala na ang tunay na tagumpay ay hindi sinusukat sa bilis ng pag-angat, kundi sa tibay ng loob habang naghihintay.
“Ang problema kasi ngayon, lahat minamadali. Lahat gusto instant. Pero ang mga bagay na magtatagal, ‘yun yung pinaghihirapan,” dagdag pa niya.
Ang mensahe ni Michael V ay simple ngunit malalim may tamang panahon para sa lahat ng bagay. Hindi kailangang mauna, basta huwag lang sumuko. Sa bawat pagkabigo, may kasamang aral. Sa bawat paghihintay, may kasunod na biyaya.
Walang komento:
Mag-post ng isang Komento