Matapos sumiklab ang isyu ng P6.7 milyong gastos sa isang gabi ng kasiyahan sa Las Vegas, binasag ng batikang mamamahayag na si Ben “Bitag” Tulfo ang kanyang pananahimik at diretsahang pinagsabihan ang pamangkin na si Quezon City 2nd District Representative Ralph Wendel Tulfo:
“Huwag kang gumaya sa mga trapo! Sumunod ka sa prinsipyo at paninindigan at sa tamang landas ng uncle mong si Bitag.”
“Hindi ko sinasabing masama ang magsaya, pero huwag mo ring kalimutan kung sino ka. Isa kang lingkod-bayan, Ralph. At ang lingkod-bayan, dapat inuuna ang bayan bago ang sarili.” dagdag ni Ben Tulfo
Ang matapang na pahayag ni Ben ay tugon sa nag-viral na video ni Ralph noong Disyembre 2023, kung saan makikita ang kongresista na tumutungga ng alak mula sa malaking bote at nagbabayad ng libu-libong dolyar sa isang high-end nightclub sa Las Vegas na umabot sa PHP 6.7 milyon ang kabuuang halaga.
Bagama’t halos dalawang taon na ang nakalipas mula nang maganap ang naturang insidente, muling umigting ang galit ng publiko matapos muling kumalat online ang nasabing video ngayong mainit ang isyu ng korapsyon at flood control scam na kinasasangkutan ng ilang kongresista, opisyal ng gobyerno, at contractors.
Sa isang opisyal na pahayag na ipinadala ni Ralph Tulfo sa programang Agenda, humingi siya ng pang-unawa sa publiko ngunit iginiit niyang walang pondo ng bayan ang ginamit sa nasabing biyahe.
“Ito ay isang personal trip. Wala kaming ginamit na pondo ng gobyerno at pera ng taumbayan,” paliwanag ni Ralph.
“Naghati-hati kami ng mga kaibigan ko sa pagbabayad, at credit card ko lamang ang ginamit.”
Subalit hindi pa rin nakaligtas si Ralph sa matitinding batikos ng netizens at ng publiko, na nagsabing “insensitive” ang kanyang naging kilos lalo na ngayong milyun-milyon ang mga Pilipinong naghihirap.
Ang isyu ng P6.7 milyong gastos ni Ralph Tulfo ay hindi lang usapin ng pera — ito ay paalala sa lahat ng lingkod-bayan na ang bawat kilos nila ay sinusukat ng taumbayan. Kahit personal pa ito, ang publiko ay may karapatang magtanong at mag-demand ng responsableng pamumuno.
Walang komento:
Mag-post ng isang Komento