Isang mainit at kontrobersyal na eksena ang naganap sa tapat ng Senate of the Philippines sa Pasay City nitong Biyernes bilang bahagi ng isinagawang Black Friday protest. Pinagsisipa at pinagbabato ng mga itlog ng mga miyembro ng isang militanteng grupo ang mga tarpaulin na may mukha nina Senador Jinggoy Estrada at Senador Joel Villanueva.
“Sawa na kaming mga Pilipino sa paulit-ulit na korapsyon. Ang pera para sa flood control, napupunta lang sa bulsa pero kami ang nalulubog sa baha.” -Kinatawan ng mga Militante
Ginawa ito ng grupo bilang simbolikong kilos-protesta upang ipahayag ang kanilang galit at pagkadismaya sa umano’y pagkakadawit ng mga senador sa mga anumalya kaugnay ng flood control projects ng pamahalaan.
Ayon sa mga militanteng grupo, sobra na ang mga kaso ng katiwalian na patuloy na nagiging sanhi ng pagkakabaon ng bansa sa utang at pagkabigo ng mga proyektong pampubliko gaya ng flood control. Naniniwala silang kailangan nang managot ang mga opisyal ng gobyerno na sangkot umano sa mga iregularidad.
Ang pagbato ng itlog at pagsipa sa mga tarpaulin ay sinadya raw upang ipakita ang pagkadismaya ng mga karaniwang mamamayan na araw-araw naapektuhan ng kapabayaan sa mga proyektong dapat sana’y nagliligtas ng buhay sa panahon ng sakuna.
Ang naganap na kilos-protesta laban kina Jinggoy Estrada at Joel Villanueva ay sumasalamin sa lumalalang galit ng mamamayan sa mga isyung may kinalaman sa korapsyon sa mga proyektong pang-infrastruktura ng bansa.
Ito ay paalala na ang tiwala ng publiko ay kailangang alagaan, at ang bawat pisong pondo ay dapat mapunta sa tama, hindi sa bulsa ng iilan. Kung walang pananagutan, patuloy lamang malulubog sa baha ang bayan — hindi lang sa tubig, kundi pati sa kawalang-hustisya.
Walang komento:
Mag-post ng isang Komento