Nagbigay ng matapang na pahayag si Pangulong Ferdinand Marcos Jr. nitong Lunes na hindi niya poprotektahan ang sinuman kahit pa mga kaalyado niya tulad nina House Speaker Martin Romualdez at Zaldy Co ng Ako Bicol party-list sa isinasagawang imbestigasyon hinggil sa umano’y iregularidad sa mga multi-bilyong pisong flood control projects.
“There’s only one way to do it they will not be spared. Wala tayong kinikilingan, wala tayong tinutulungan. No one will believe us unless we actually do it, so we will,” mariing pahayag ni Marcos sa isang press briefing.
Ipinunto rin ng Pangulo na ang Independent Commission for Infrastructure (ICI) na kanyang itinatag kamakailan ay ganap na malaya at walang magiging panghihimasok mula sa Malacañang.
“We will not intervene in their work. Of course, we will ask for updates, but we will not dictate how they conduct their investigation,” dagdag niya.
Layunin ng ICI na imbestigahan ang mga umano’y anomalya sa mga flood control projects at magmungkahi ng mga reporma sa bidding at contracting process upang maiwasan ang mga katiwaliang tulad nito sa hinaharap.
Nabanggit sina Romualdez at Co sa mga pagdinig sa Senado matapos silang isa-isang pangalanin ng contractor na si Curlee Discaya, ngunit kalaunan ay nilinaw ni Discaya na wala siyang personal na naging transaksyon sa kanila. Parehong itinanggi ng dalawang mambabatas ang mga paratang at sinabing ito ay pawang kasinungalingan at may halong pulitika.
Ang matigas na paninindigan ni Ferdinand Marcos Jr. laban sa mga alegasyon ng katiwalian ay nagpapakita ng mensahe na walang sinuman kahit kaalyado ang dapat maprotektahan kapag usapin na ang pananagutan. Sa pagbuo ng Independent Commission for Infrastructure, layunin ng administrasyon na ipatupad ang patas at malayang imbestigasyon, at ayusin ang sistema upang maiwasan ang mga katiwalian sa hinaharap.
Walang komento:
Mag-post ng isang Komento