Hindi na nagpatumpik-tumpik pa ang Kapuso actress na si Carla Abellana sa kanyang paninindigan para sa kapakanan ng mga hayop. Sa panayam, muling binigyang-diin ng aktres ang kanyang adbokasiya laban sa animal cruelty at iginiit na dapat magkaroon ng mas mahigpit na pagpapatupad ng batas laban sa mga umaabuso sa mga alagang hayop.
Ayon kay Carla, hindi sapat ang paglabas ng suporta sa social media—dapat ay may konkretong aksyon laban sa mga lumalabag.
“Alam naman po ng tao, ng public, ng aking mga followers, kung saan po ako talagang nakatayo. They know my stand, and all that. Hindi man po ako magiging parte, or hindi man nila ako makakasama, of course they have my full support,” pahayag ni Carla.
Dahil sa dumaraming ulat ng pang-aabuso, paglalason, at pagpapabaya sa mga aso’t pusa, naniniwala si Carla na dapat mapanagot sa batas ang mga gumagawa nito. Para sa kanya, hindi na dapat palampasin ang mga ganitong insidente dahil bawat hayop ay may karapatan ding mabuhay nang may respeto at pagmamahal.
Matagal nang kilala si Carla bilang isa sa mga pinakaaktibong celebrities na tagapagtanggol ng mga hayop. Bukod sa pagiging pet lover, aktibo rin siyang sumusuporta sa mga animal welfare groups at madalas ginagamit ang kanyang social media platforms para itaas ang awareness tungkol sa tamang pag-aalaga at pangangalaga ng mga alaga.
Ang paninindigan ni Carla Abellana ay malinaw na hindi lang para sa kanyang mga alaga, kundi para sa lahat ng hayop na madalas na inaabuso at pinapabayaan. Ang kanyang boses ay nagsisilbing inspirasyon at panawagan para sa mas mahigpit na proteksyon at hustisya para sa mga hayop.
Walang komento:
Mag-post ng isang Komento