Sa kabila ng hirap ng buhay, mabigat na responsibilidad sa pamilya, at kakulangan sa suporta, pinatunayan ni Jesus Fuentes, 41-anyos na ama mula sa Barangay Labangon, Cebu City, na hindi hadlang ang kahirapan o edad sa pagtatapos ng pag-aaral.
"Wala pong nahuhuli sa pag-abot ng pangarap. Kahit 41 na ako, pinatunayan kong posible pa rin. Hindi ko ito ginawa lang para sa sarili ko, kundi para sa mga anak ko, para sa pamilya ko. Hindi ko man agad nakuha, ang mahalaga hindi ako tumigil." -JESUS FUENTES
Sa edad na 41-anyos, habang abala sa paglalako ng chicharon at pagbubuhay ng kanyang pamilya, sinimulan niyang tuparin muli ang pangarap — ang makapagtapos ng kolehiyo. At ngayong taon, isa na siyang graduate ng Bachelor of Elementary Education mula sa Talisay City College.
Bata pa lang si Fuentes ay pangarap na niyang makapagtapos ng pag-aaral, ngunit dahil sa kahirapan, nagtapos siya ng high school sa edad na 22. Sa sumunod na taon, nag-asawa na siya at kalauna'y nagkaroon ng apat na anak. Upang matustusan ang pang-araw-araw, pumasok siya bilang gasoline boy at merchandiser.
Kuwento niya, “May mga panahong gusto ko nang sumuko. Pero naisip ko, paano ako magiging magandang halimbawa sa mga anak ko kung ako mismo susuko sa pangarap ko?”
Hindi naging madali ang pagbabalik-eskwela. Bitbit ang mga panindang chicharon, naglalakad siya papuntang klase, nag-aalok sa mga estudyante at guro habang dala rin ang bag ng libro. Kahit pagod, hindi niya tinalikuran ang desisyon niyang ituloy ang laban para sa diploma.
Ang kwento ni Jesus Fuentes ay kwento ng pag-asa, sakripisyo, at walang sawang determinasyon. Isa siyang buhay na patunay na kahit gaano kahirap ang kalagayan, hindi hadlang ang edad, kahirapan, o opinyon ng iba sa pag-abot ng pangarap.
Ang kanyang tagumpay ay inspirasyon hindi lang sa mga magulang, kundi sa lahat ng Pilipinong patuloy na lumalaban sa buhay. Sa bawat chicharon na kanyang naibenta, may kasamang pangarap na unti-unting nabuo.
"Kung may pangarap ka, ipaglaban mo. Hindi ito tungkol sa kung gaano ka kabilis, kundi kung gaano ka katatag sa gitna ng lahat." – Jesus Fuentes
Walang komento:
Mag-post ng isang Komento