Isa na namang kontrobersiya ang yumanig sa mababang kapulungan ng Kongreso matapos mahuling nanunuod ng online sabong si AGAP Party-list Rep. Nicanor Briones habang ginaganap ang isang mahalagang legislative session para sa botohan ng bagong House Speaker.
"Kapag nasa loob ka ng Kongreso, dapat trabaho muna. Respeto sa opisina, respeto sa taong bayan." -Marcos Administration
Ang insidente ay nakuhanan sa isang viral na larawan na nagpapakitang tila abala si Rep. Briones sa panonood ng online sabong habang nagaganap ang pormal na sesyon. Umani ito ng matinding batikos mula sa netizens at iba't ibang sektor, na iginiit ang kawalan ng respeto sa institusyon at sa taumbayan.
Sa isang press forum ng Manila City Hall Reporters’ Association (MACHRA) noong Hulyo 30, mismong ang Presidential Anti-Organized Crime Commission (PAOCC) na ang nanawagan ng imbestigasyon sa naturang kongresista. Ayon kay PAOCC Secretary Gilbert Cruz, hindi basta-basta ang insidente at dapat itong bigyang pansin.
"Well, sa akin ho, dapat imbestigasyon ’yon. Botohan ’yon, ’di ba [ng House Speakership]? Siguro respeto na lang po sa office," saad ni Cruz.
Ang sesyon ng Kongreso ay itinuturing na sagrado sa ilalim ng batas at demokrasya ng bansa. Kaya’t ang panonood ng sugal online habang ginaganap ito ay hindi lang kawalang-respeto, kundi maaaring ituring na paglabag sa moral at etikal na pamantayan ng isang mambabatas.
Wala pang opisyal na pahayag si Rep. Briones hinggil sa insidente, ngunit marami na ang nananawagan ng accountability at aksyon mula sa House of Representatives upang mapanagot ang sinumang lumalabag sa kanilang tungkulin bilang lingkod-bayan.
Ang pagiging mambabatas ay may kasamang malaking responsibilidad—hindi lamang sa paggawa ng batas kundi sa pagbibigay-halaga sa tiwala ng taong bayan. Sa panahong kritikal ang pananampalataya ng publiko sa mga opisyal, ang panonood ng sabong habang may session ay isang malinaw na senyales ng kawalan ng disiplina.
Ang panawagan ng PAOCC ay isang paalala na walang sinuman ang dapat ituring na higit sa batas—maging ito man ay isang party-list representative. Hindi kasalanan ang magpahinga o maglibang, ngunit sa tamang oras at tamang lugar. Sa loob ng Kongreso, trabaho muna bago aliw.
Walang komento:
Mag-post ng isang Komento