Nagbigay ng kontrobersiyal ngunit prangkang pahayag ang dating PNP Chief Rommel Marbil, kung saan muling iginiit niya na hindi dapat awtomatikong ituring na masasamang tao ang lahat ng gumagamit ng ilegal na droga. Ayon sa kanya, may mga indibidwal na umano’y gumagamit ng ipinagbabawal na substance para lamang manatiling gising o magpatuloy sa trabaho, isang pahayag na agad nagpainit ng diskusyon sa publiko.
“Hindi lahat ng gumagamit ng droga ay masamang tao. May iba na ginagawa lang ito dahil sa sobrang pagod para manatiling gising sa trabaho. May ilan pa nga na mataas ang posisyon, pero naliligaw dahil sa pressure." -Dating PNP Chief Rommel Marbil
Pinaliwanag ni Marbil na sa kanyang karanasan sa law enforcement, may mga pagkakataong nasasangkot sa droga ang ilang manggagawa at propesyonal hindi dahil intensyon nilang gumawa ng krimen, kundi dahil sa matinding pressure at pagod sa kanilang trabaho. Dagdag pa niya, mayroon pa raw mga nasa mataas at mahalagang posisyon sa gobyerno at pribadong sektor na nagiging biktima rin ng maling pagdedesisyon dahil sa pagod at responsibilidad.
Nilinaw naman ng dating hepe na hindi niya sinasabing tama o dapat pamarisan ang paggamit ng droga. Sa halip, ang kanyang punto umano ay ang pagkilala na may mga kaso kung saan hindi simpleng “masama” ang tao kundi naliligaw, napapagod, o hindi alam kung paano humingi ng tulong. Ayon kay Marbil, ang pagharap sa problema ng droga sa bansa ay dapat nakabatay sa rehabilitasyon, edukasyon, at tamang pag-unawa hindi lang sa paninisi.
Ang pahayag ni Marbil ay nagbukas ng malawak na diskusyon tungkol sa tunay na kalagayan ng drug problem sa bansa, isang problema na hindi lang nakaugat sa krimen kundi sa pagod, kahirapan, at kakulangan ng suporta sa mental at physical well-being ng mga Pilipino.
Walang komento:
Mag-post ng isang Komento