Mainit ngayon sa social media at sports community ang pangalan ni Eman Bacosa Pacquiao, anak ng dating boxing legend at senador na si Manny “Pacman” Pacquiao sa isa pang babae. Kamakailan ay nagwagi si Eman sa isang boxing event na ginanap sa Manila, bilang bahagi ng undercard ng “Thrilla In Manila 2”, kung saan pinanatili niyang malinis ang kanyang professional record bilang Lightweight prospect.
Bukod sa kanyang husay sa ring, maraming netizen din ang napansin sa kanyang ka-gwapuhan na pang-artista. Matangos ang ilong, matikas ang tindig, at may karismang kaakit-akit dahilan upang siya’y mapansin hindi lamang ng mga boxing fans kundi pati ng mga tagahanga sa showbiz world.
Ngunit sa kabila ng mga papuri, nananatiling nakatuon sa boxing si Eman. Ayon sa kanya, mas gusto niyang patunayan muna ang sarili bago siya kilalanin dahil sa kanyang apelyido.
“Focus po muna ako sa boxing. Hindi madali ang pinili kong landas, pero gusto kong sundan at gawan ng sarili kong pangalan ‘yung ginawa ng tatay ko. Siya ang inspirasyon ko, pero gusto kong magtagumpay sa sarili kong paraan,” sabi ni Eman.
Dagdag pa niya, malaking hamon na maging anak ni Manny Pacquiao, dahil laging may kasamang pressure at inaasahan ang publiko. Ngunit sa halip na matakot, ginagamit niya ito bilang motibasyon para mas magsikap sa bawat ensayo at laban.
“Hindi ko gustong maging kopya ni Papa. Gusto ko lang marating ‘yung level ng dedication at puso na meron siya. Kasi sa boxing, hindi lang lakas ang kailangan, kundi puso at disiplina,” dagdag pa ni Eman.
Dahil sa kanyang tagumpay, bumuhos ang suporta sa kanya mula sa mga boxing fans at netizens. Marami ang naniniwala na si Eman Bacosa Pacquiao ang susunod na henerasyon ng Pacquiao legacy, isang batang may potensyal, determinasyon, at kababaang-loob na tunay na taglay ng isang champion.
Ang tagumpay ni Eman Bacosa Pacquiao ay patunay na ang dugo ng isang kampeon ay hindi basta nawawala. Sa kabila ng mga mata ng publiko at ng bigat ng apelyidong dala niya, pinatunayan niyang may kakayahan siyang mag-ukit ng sariling pangalan sa kasaysayan ng boksing.
Walang komento:
Mag-post ng isang Komento