Matapang ang naging pahayag ni Pangulong Ferdinand “Bongbong” Marcos Jr. kaugnay ng mga opisyal na nasasangkot sa bilyon-bilyong pisong anomalya sa mga flood control projects, na nagsasabing hindi sapat ang simpleng pagbibitiw sa puwesto upang makaiwas sa pananagutan.
“No, that’s not enough. That’s not enough,” mariing pahayag ni Marcos sa pinakabagong episode ng kanyang podcast, nang tanungin kung sapat na bang depensa ang pagbibitiw para makaiwas sa kasong dapat harapin.
Ayon sa Pangulo, kailangang panagutin sa ilalim ng batas ang mga taong mapatutunayang may sala, at hindi dapat maging “exit card” ang pagbibitiw upang takasan ang pananagutan sa taumbayan.
Binigyang-diin ni Marcos Jr. na hindi sapat ang pag-alis sa puwesto kung ang layunin nito ay makaiwas sa imbestigasyon. Aniya, “Ang pagbibitiw ay hindi kapalit ng hustisya. Ang mga nasangkot ay kailangang humarap sa imbestigasyon at managot kung may kasalanan.”
Bunsod ng eskandalo, itinatag ng Pangulo ang Independent Commission for Infrastructure (ICI) upang masusing imbestigahan ang mga iregularidad sa mga flood control project ng gobyerno.
Sa inilabas nitong interim report, hiniling ng ICI sa Office of the Ombudsman ang pagsasampa ng graft charges laban sa 18 indibidwal, kabilang na ang nagbitiw na kongresista na si Elizaldy “Zaldy” Co. Isa sa mga proyektong iniimbestigahan ay ang substandard flood control project sa Oriental Mindoro na nagkakahalaga ng PHP289.5 milyon.
Sa gitna ng isa sa pinakamalalaking eskandalo ng korapsyon sa imprastruktura, ipinahayag ni Pangulong Bongbong Marcos Jr. ang kanyang paninindigan na walang sinuman ang dapat makatakas sa pananagutan sa pamamagitan ng simpleng pagbibitiw sa puwesto. Ang hamon ngayon ay ang pagsasakatuparan ng rule of law, isang proseso na magbibigay ng tunay na hustisya sa sambayanang Pilipino.
Walang komento:
Mag-post ng isang Komento