Kumpirmado mula mismo sa Malacañang na si dating Philippine National Police (PNP) Chief Gen. Nicolas Torre III ay inalok ni Pangulong Ferdinand “Bongbong” Marcos Jr. ng isang bagong posisyon sa gobyerno, isang araw matapos ang kanyang agarang pag-alis bilang hepe ng PNP noong Agosto 26, 2025.
“Lubos akong nagpapasalamat kay Pangulong Marcos sa tiwalang ibinibigay niya sa akin. Mabigat ang trabahong ito pero handa akong maglingkod kung saan ako kinakailangan ng bayan.” -Gen. Nicolas Torre
Sa isang press briefing, sinabi ni Presidential Communications Office (PCO) Undersecretary Claire Castro na totoo ang balita ukol sa bagong tungkulin na inaalok kay Torre.
“Hindi pa po natin maisisiwalat ang detalye patungkol dito pero confirmed po na may inaalok na posisyon,” pahayag ni Castro.
Dagdag pa niya, mas mabigat at mas kritikal ang posisyong ito kumpara sa dati niyang trabaho bilang PNP chief.
“Mabigat ang posisyon, mabigat ang trabaho na mukhang siya lang makakapagtrabaho. ‘Yun kasi ang plano ng Pangulo,” paliwanag niya.
Bagama’t hindi pa inaanunsyo ang eksaktong posisyon, tiniyak ng Palasyo na mismong si Pangulong Marcos Jr. ang maglalabas ng opisyal na pahayag sakaling tanggapin ni Torre ang alok.
Ayon kay Castro, malinaw na tiwala pa rin ang Pangulo sa kakayahan ni Torre at nakikita itong mahalagang bahagi ng kanyang administrasyon.
Matatandaan na tinanggal si Gen. Torre bilang ika-31 PNP Chief noong Agosto 26, 2025. Wala pang ibinibigay na malinaw na dahilan ang Palasyo sa kanyang biglaang relief, ngunit malinaw na agad siyang inaalok ng bagong papel sa gobyerno.
Bagama’t hindi malinaw ang dahilan sa kanyang biglaang pagkawala sa puwesto bilang PNP chief, isang bagay ang tiyak: patuloy pa ring nakikita ng Malacañang ang kahalagahan ng serbisyo ni Gen. Nicolas Torre. Ang inaalok na posisyon ay hindi lamang isang bagong yugto ng kanyang karera, kundi isang patunay na malaki ang tiwala ng Pangulo sa kanyang kakayahan.
Walang komento:
Mag-post ng isang Komento