Inihayag ng Metropolitan Manila Development Authority (MMDA) na ang proyektong Dolomite Beach sa Maynila ang pangunahing dahilan ng matinding pagbaha sa Taft Avenue tuwing malakas ang ulan. Ayon kay MMDA Chair Don Artes, tatlong pangunahing drainage outfalls Faura, Remedios, at Estero San Antonio Abad ang isinara nang simulan ang rehabilitasyon ng Manila Baywalk, dahilan para maipon ang tubig-ulan at hindi agad makaagos.
“Noong ginawa ‘yung Dolomite Beach, sinara itong tatlong outfall at pinadaan sa sewerage treatment plant. Kapag tag-ulan, hindi nito kayang ilabas ang tubig, kaya naiipon sa Remedios Taft Avenue area,” paliwanag ni Artes.
“Hindi namin sinasabi na mali ang Dolomite Beach project, pero kailangan ng agarang solusyon para bumuti ang daloy ng tubig at maiwasan ang pagbaha, lalo na sa panahon ng malalakas na ulan.” -Artes
Ang sewerage treatment plant, na pansamantalang dinaanan ng tubig, ay hindi kayang sabayan ang dami ng ulan, kaya nagbabalik ang tubig at bumabaha sa mga kalapit na kalsada.
Ayon sa MMDA, nakikipag-ugnayan na sila sa Department of Environment and Natural Resources (DENR) para pansamantalang buksan ang mga nakaselyong drainage outfalls tuwing tag-ulan upang mas mapabilis ang pagdaloy ng tubig.
“Hindi namin sinasabing mali ang proyekto, pero kailangan talaga ng solusyon para sa daloy ng tubig lalo na sa panahon ng tag-ulan,” dagdag pa ni Artes.
Kasabay nito, kausap na rin ng MMDA ang Department of Public Works and Highways (DPWH) para sa pangmatagalang solusyon na magpapahusay sa drainage system ng Maynila. Target ng ahensya ang rehabilitasyon at reengineering ng mga drainage lines upang maiwasan ang pag-apaw ng tubig sa mga pangunahing kalsada tulad ng Taft Avenue.
Ang pahayag ng MMDA ay nagbigay-linaw kung bakit nananatiling problema ang baha sa Taft Avenue, lalo na tuwing malakas ang ulan. Bagamat may maganda itong layunin, ang Dolomite Beach project ay nagdulot ng hindi inaasahang epekto sa drainage system ng Maynila.
Kung maipapatupad ang panukalang buksan muli ang tatlong drainage outfalls tuwing tag-ulan, maaaring maibsan ang pagbaha at maipakita na ang mga proyektong pangkalikasan ay dapat kaakibat ng tamang urban planning at flood management.
Walang komento:
Mag-post ng isang Komento