Bilang paggunita sa kaarawan ng Screen Legend na si Nora Aunor, muling ibinabalik ng Kamuning Bakery Café—ang pinakamatandang panaderya sa Quezon City—ang espesyal na tinapay na Pan de Nora. Ipinahayag ng may-ari ng panaderya na si Wilson Lee Flores na ang pagbabalik ng tinapay ay gaganapin simula Mayo 21, kasabay ng pagdiriwang ng ika-72 kaarawan ni Nora Aunor.
Ang Pan de Nora ay may kakaibang anyo: isang monay na may "mole" o tuldok sa ibabaw, na simbolo ng sikat na beauty mark ni Ate Guy—isa sa mga pinaka-kinikilalang mukha sa kasaysayan ng pelikulang Pilipino.
“Ang Pan de Nora ay tribute namin kay Superstar. Isang alaalang puwedeng tikman,” ani Wilson Lee Flores.
Ayon sa beteranong entertainment columnist na si Nestor Cuartero, unang sumikat ang Pan de Nora noong early 1970s, sa kasagsagan ng katanyagan ni Nora Aunor.
“Monay siya na may konting dot o parang pasas. Panahon ng kasikatan ni Nora, pinakilala na ‘yan bilang Pan de Nora,” pagbabalik-tanaw ni Cuartero.
Dagdag pa niya, ang orihinal na bersyon ng tinapay ay nagmula sa Iriga City, Camarines Sur—lugar kung saan isinilang ang Superstar. Doon daw naging inspirasyon si Nora sa mga lokal na panadero na lumikha ng tinapay na para sa kanya.
Ang pagbabalik ng Pan de Nora ay hindi lang para sa mga Noranian, kundi pati na rin sa mga bagong henerasyon na nais makilala si Ate Guy hindi lang sa pelikula, kundi pati sa panlasa.
“Nakakatuwa na ginawan siya ng Kamuning Bakery, in remembrance of Nora Aunor. Maganda ang tribute na ito,” ani Cuartero.
Ang pagbabalik ng Pan de Nora ay isang simpleng alay na may malalim na kahulugan—hindi lang pag-alala sa isang alamat sa showbiz, kundi pagrespeto sa kanyang kontribusyon sa kulturang Pilipino. Sa bawat kagat ng tinapay, may dalang alaala ng panahon na si Ate Guy ang reyna ng puso ng bayan.
“Ang Pan de Nora ay hindi lang tinapay—ito ay simbolo ng pagmamahal ng masa. Nakakatuwang maalala na sa kahit simpleng paraan, naaalala pa rin si Mama,” — Wilson Lee Flores, Kamuning Bakery Café
Walang komento:
Mag-post ng isang Komento