Mariing itinanggi ng Malacañang ang paratang na pakawala ng administrasyon ang impeachment complaint na inihain laban kay Ferdinand Marcos Jr.. Ayon sa Palasyo, walang anumang kinalaman ang ehekutibo sa paghahain ng naturang reklamo.
“Bakit niya i-impeach ang sarili niya? Kung ganoon kalakas ang Pangulo na kontrolado pati impeachment, aba’y sobra naman ang credit n’yo sa amin. Ang executive, walang role diyan kahit gusto n’yo pang gawing mastermind.” -Atty. Claire Castro
Nilinaw ni Atty. Claire Castro, tagapagsalita ng Malacañang, na hiwalay ang proseso ng impeachment sa kapangyarihan ng executive department at hindi maaaring panghimasukan ng Pangulo ang isang mekanismong malinaw na nakatalaga sa lehislatura.
Sa kanyang pahayag, tinanong ni Castro ang lohika sa likod ng paratang. Aniya, walang saysay ang ideya na ang Pangulo mismo ang mag-uudyok ng impeachment laban sa kanyang sarili. Dagdag pa niya, ang executive ay walang papel sa impeachment, at malinaw ito sa Saligang Batas.
Ipinunto ng Malacañang na ang impeachment ay konstitusyonal na tungkulin ng House of Representatives, at ang ehekutibo ay walang legal na kapangyarihang magdikta kung ito’y ihahain o hindi. Para sa administrasyon, ang patuloy na pagdudugtong sa Pangulo ay nagpapalabo sa tunay na isyu at naglalayo sa tamang diskurso.
Ang mariing pagtanggi ng Malacañang ay muling naglatag ng linya sa pagitan ng haka-haka at proseso. Ayon sa Palasyo, ang impeachment ay hindi proyekto ng ehekutibo kundi desisyon ng lehislatura.
Walang komento:
Mag-post ng isang Komento