Masayang ibinahagi ni Pangulong Ferdinand “Bongbong” Marcos Jr. na magsasagawa ang pamahalaan ng pamimigay ng tulong pinansyal para sa mga pamilyang lubos na naapektuhan ng Bagyong Tino sa Cebu at mga karatig-probinsiya.
Ayon sa Pangulo, layunin ng programang ito na matulungan ang mga pamilyang nawalan ng tirahan na makabangon muli at muling makapagsimula.
“Ang bawat pamilya na nasiraan ng bahay ay makatatanggap ng tulong pinansyal mula sa gobyerno, P5,000 para sa mga partially damaged na bahay, at P10,000 para sa mga totally damaged na bahay,” anunsyo ni Marcos Jr. sa kaniyang talumpati sa isang relief distribution event sa Cebu.
Paliwanag ni Pangulong Marcos, ang perang ibibigay ay hindi lamang tulong pansamantala, kundi bahagi ng programa sa rehabilitasyon at pagbangon ng mga nasalanta ng kalamidad.
“Gamitin ninyo ang tulong na ito sa pag-aayos ng inyong mga tahanan. Alam ko na mahirap magsimula muli, pero hindi namin kayo pababayaan,” saad ng Pangulo.
Kasabay ng pamimigay ng ayuda, nagpadala rin ang Department of Social Welfare and Development (DSWD) ng family food packs, hygiene kits, at mga construction materials tulad ng yero at kahoy para sa mga nangangailangan.
Ayon sa ulat ng National Disaster Risk Reduction and Management Council (NDRRMC), mahigit 80,000 pamilya ang nawalan ng bahay o nasiraan dahil sa hagupit ni Bagyong Tino.
Ang hakbang ni Pangulong Ferdinand Marcos Jr. ay nagpapakita ng pagtutok ng pamahalaan sa agarang pagbangon ng mga Pilipino matapos ang trahedyang dulot ng Bagyong Tino. Bagama’t limitado ang halaga ng tulong, ito ay nagsisilbing simbolo ng pag-asa at malasakit ng gobyerno sa mga apektadong pamilya.
Walang komento:
Mag-post ng isang Komento