Sa likod ng bawat operasyon, pagsabog na naiwasan, o krimen na napigilan, ay may tahimik na bayani ang mga K9 dogs ng Philippine National Police (PNP). Ngunit sa isang viral na larawan kamakailan lang, isang K9 dog ang makikitang buto’t balat, kitang-kita ang mga tadyang, at tila pinabayaan isang imahe na nagpabigat sa loob ng maraming Pilipino.
Dahil dito, nagpadala ng bukas na liham ang Animal Kingdom Foundation (AKF) sa PNP Explosives Ordnance Disposal and Canine Group upang kondenahin ang kalagayan ng nasabing aso at panawagang agarang imbestigahan ang lahat ng K9 dogs na nasa kanilang pangangalaga.
Ayon sa AKF:
"Ang inyong unit ay hindi lamang inaasahang maging disiplinado, kundi inaasahang sumusunod sa makataong pagtrato sa mga hayop. Ang kalusugan at kapakanan ng inyong K9 ay legal at moral na obligasyon."
“Ang mga K9 dogs ay walang tinig, pero may puso. Sila ay bayani na dapat tratuhing may dignidad at respeto. Ang pagmamahal sa hayop ay hindi dapat mawala kahit sa loob ng serbisyo.”
Tinukoy rin ng AKF ang Republic Act No. 8485 o Animal Welfare Act, na nagsasaad na lahat ng hayop lalo na ang mga nasa public service ay dapat mabigyan ng sapat na pagkain, tirahan, at atensyong medikal.
Maraming netizens ang umapela ng hustisya para sa K9 dog. Ayon sa isang komento,
“Ang aso ay may puso rin. Hindi sila dapat tratuhing gamit lang na kapag wala na, itatapon na.”
May ilan ding dating K9 handlers na nagbahagi ng kanilang karanasan, anila’y “hindi biro ang trabaho ng mga asong ito. Minsan mas inuuna pa nila ang buhay ng amo nila kaysa sarili nila.”
Hindi natin makakalimutang ang K9 dogs ay kapwa natin tagapagtanggol tahimik mang gumalaw, tapat na tapat sa tungkulin. Ang kanilang kalagayan ay repleksyon ng ating pagkatao bilang isang lipunan. Sa panahong sila naman ang nangangailangan, tungkulin nating maging boses nila. Bayani rin sila at ang mga bayani, hindi dapat pinapabayaan.
Walang komento:
Mag-post ng isang Komento