Inilabas ng Department of Budget and Management (DBM) ang proposed National Expenditure Program (NEP) para sa 2026, at kabilang sa mga kapansin-pansing detalye ay ang pagtaas ng pondo para sa mga opisyal na biyahe ni Pangulong Ferdinand "Bongbong" Marcos Jr.
“Ang bawat biyahe ay may layuning magdala ng oportunidad at trabaho sa ating mga kababayan. Ang ₱1.018 bilyon na pondo ay hindi luho kundi isang investment para sa mas maunlad na Pilipinas.” -PBBM
Ayon sa budget documents, ₱1.018 bilyon ang inilaan para sa lokal at internasyonal na paglalakbay ng Pangulo sa 2026 — mas mataas kumpara sa ₱982.6 milyon na nakapaloob sa NEP ng 2025. Ang pondo ay para sa mga state visits, diplomatic meetings, at iba pang opisyal na pagdalo sa loob at labas ng bansa.
Ipinahayag ni Labor Secretary Bienvenido Laguesma na nakalikha na ng humigit-kumulang 200,000 trabaho para sa mga Pilipino ang mga foreign visits ng Pangulo, bunga ng mga investment at kasunduang nalagdaan sa mga ito.
Sa kabuuan, aabot sa ₱27.236 bilyon ang mungkahing budget para sa Office of the President (OP) sa 2026, malayo sa ₱15.9 bilyon ngayong taon. Muli rin itong magkakaroon ng pinakamalaking bahagi para sa confidential at intelligence funds (CIF) na ₱4.5 bilyon, habang nananatiling walang pondo para sa CIF ng Office of the Vice President.
Ang pagtaas ng travel budget ng Pangulo para sa 2026 ay nag-iiwan ng tanong kung sapat bang naipapakita ng mga biyahe ang kapalit nito sa ekonomiya at trabaho para sa mga Pilipino. Habang may mga nagsasabing nakikinabang ang bansa sa mga international agreements, may mga sektor ding nananawagan ng masusing pagsusuri sa paggastos ng pondo ng bayan.
Walang komento:
Mag-post ng isang Komento