Walong taon matapos ang malagim na pagkamatay ng 17-anyos na si Kian delos Santos, muling nagtipon ang kanyang mga kaanak at tagasuporta upang alalahanin ang kanyang alaala at ipanawagan ang katarungan para sa lahat ng biktima ng extra-judicial killings (EJK) sa ilalim ng war-on-drugs campaign ng administrasyon ni dating Pangulong Rodrigo Duterte.
“Kinakailangan nating wag kalimutan na hanggang ngayon, hindi pa natin nakakamit ang tunay na katarungan. Hinihintay pa rin natin na mapanagot ang tunay na mastermind ng madugong war on drugs.” -Rep. Percy Cendaña
Dagdag pa ng tiyuhin ni Kian:
“Sa isang bahagi po kasi, si Kian yung naging marka, e, at pag-amin na nagkaroon ng extra-judicial killing. Tandaan natin na hindi lang si Kian. Marami pang pinatay na wala pa ni isa ang napapanagot.”
Sa pamamagitan ng vigil at pag-alala, muling iginiit ng mga dumalo na ang laban para sa hustisya ay hindi dapat matapos, at ang alaala ni Kian ay magsisilbing paalala sa lipunan ng pangangailangang ipaglaban ang karapatang pantao.
Noong Agosto 16, 2025, nag-alay ng bulaklak at kandila sa mismong lugar kung saan binaril si Kian sa Libis Baesa, Caloocan City. Pinangunahan ito ni Akbayan Party-list Representative Percy Cendaña at ng tiyuhin ni Kian na si Randy delos Santos.
Si Kian ay pinaslang noong Agosto 16, 2017, matapos pagbabarilin ng ilang miyembro ng Caloocan police. Ang kanyang kaso ay nagsilbing simbolo ng mga kabataang nadadamay at nawawalan ng buhay sa gitna ng kampanya kontra droga.
Ayon sa tala ng Human Rights Watch, mahigit 12,000 Pilipino na ang nasawi sa anti-drug campaign. Para sa pamilya at mga kaibigan ni Kian, ang kanyang kamatayan ay hindi lamang isang personal na trahedya kundi isang marka ng pag-amin na tunay ngang may naganap na EJK sa bansa.
Ang ika-walong anibersaryo ng pagkamatay ni Kian delos Santos ay nagsilbing paalala na ang laban para sa katarungan ay hindi natatapos sa paglipas ng panahon. Para sa kanyang pamilya at mga tagasuporta, si Kian ay simbolo ng pag-asa at panawagan para sa pananagutan, hindi lamang para sa kanya kundi para sa lahat ng biktima ng EJK. Sa pag-alala kay Kian, pinapaalalahanan tayong lahat na ang katotohanan at hustisya ay dapat patuloy na ipaglaban.
Walang komento:
Mag-post ng isang Komento