Matapang na pinabulaanan ni veteran broadcaster Julius Babao ang paratang na tumanggap siya ng ₱10 milyon mula sa mag-asawang Curlee at Sarah Discaya kapalit ng isang panayam.
Sa kanyang pahayag, nilinaw ni Julius na ang kanilang interview ay naganap mahigit isang taon na ang nakalipas, at wala pa raw plano ang mag-asawa na pumasok sa pulitika noong panahong iyon. Ayon sa kanya, ang tanging layunin ng Discaya couple ay maibahagi ang kanilang rags-to-riches success story sa publiko.
“Nung mangyari ang interview, wala pang nabanggit na plano ang mag-asawa na papasukin nila ang pulitika. Hindi pa din lumabas ang kahit anong isyu na may kinalaman sa kanilang mga government projects nung panahong ito. Ang nais lang nila noon ay ma-share ang kanilang success story sa publiko,” paliwanag ni Babao.
Ang panayam ay bahagi ng kanyang Unplugged YouTube channel, na hanggang ngayon ay maaari pang mapanood online.
Nag-ugat ang usapin nang mag-post si Pasig City Mayor Vico Sotto sa Facebook noong Agosto 21, 2025. Sa kanyang post, binatikos niya ang ilang mamamahayag na umano’y tumatanggap ng milyon-milyong halaga para mag-interview ng mga contractors na pumapasok sa pulitika.
Bagamat walang direktang pinangalanan, naglagay siya ng screenshots ng mga interview nina Julius at Korina Sanchez sa Discaya couple, dahilan para madamay ang dalawang broadcast journalists sa isyu.
Ayon kay Mayor Vico:
“I know for a fact that there are many good, honest people in media who are disappointed, if not angered, at practices like this which undermine the integrity of their profession.”
Dagdag pa niya, maaaring hindi ito illegal, ngunit malinaw umanong nakakasira ito ng reputasyon at kredibilidad ng isang journalist.
Matatandaang si Sarah Discaya ay nakalaban mismo ni Mayor Vico sa mayoral race sa Pasig City noong May 2025 elections. Samantalang si Curlee Discaya at ang kanilang mga kumpanya ay iniimbestigahan dahil sa umano’y bilyong pisong kontrata sa DPWH flood control projects.
Ang pagtanggi ni Julius Babao ay malinaw na pagtatanggol sa kanyang reputasyon bilang isang mamamahayag na matagal nang nasa industriya. Habang naninindigan si Mayor Vico sa kanyang panawagan para sa mas mataas na pamantayan sa media, ipinapakita naman ni Julius na hindi lahat ng panayam ay may bahid ng pulitika o pera. Sa huli, nananatiling hamon ang pagpapanatili ng kredibilidad ng media sa panahon ng matinding politika at disinformation.
Walang komento:
Mag-post ng isang Komento