Malaki ang papel ng mga guro sa paghubog ng kinabukasan ng mga bata. Sila ang inaasahan hindi lamang sa pagtuturo ng kaalaman kundi pati na rin sa pagbibigay ng inspirasyon at pag-unawa. Ngunit paano kung ang mismong guro ang nagiging dahilan ng takot at trauma ng isang batang nagsisimula pa lang sa kanyang paglalakbay sa paaralan?
Isang viral na post ng magulang na si Trish Khea Yudan Bulosan ang gumulantang sa social media matapos ibahagi ang sinapit ng kanyang anak na si Prince Aaron, Grade 1 student, sa unang araw ng klase. Ayon kay Trish, iniwan ang anak sa loob ng classroom na umiiyak dahil umano “hindi ito marunong magsulat.”
“Sobrang sakit bilang magulang na imbes na makita ko siyang masaya at excited pumasok, ngayon natatakot na siyang mag-aral. Kahit ilipat ko siya ng school, may takot pa rin. Sana ang mga teachers, lalo na sa Kinder at Grade 1, magkaroon ng mas mahabang pasensya. Bata pa sila, kailangan ng guidance, hindi galit.” - Trish magulang ng Grade 1 student
Dagdag pa niya, sinabi raw ng guro na kahit anong gawin ay hindi marunong magsulat ang bata, dahilan para hindi ito makasabay sa klase. Ngunit laking gulat ni Trish dahil sa bahay ay marunong naman magsulat at magbasa ang anak. Kaya’t agad niyang kinumpronta ang sitwasyon at nalaman na pinapagalitan at pinipitik daw si Aaron ng kanyang guro, kaya natrauma at hindi na makapagsulat sa loob ng classroom.
Sa video na ibinahagi ng magulang, makikitang humahagulgol ang bata at nababasa ng luha ang papel. Mas masakit pa para sa ina ang makita na nawalan na ng gana ang kanyang anak sa pag-aaral, kahit na dati ay excited itong pumasok at matuto.
Dagdag pa ni Trish, nagseselos na raw ang kanyang anak sa mga kaibigan nitong pumapasok sa paaralan at natatanong pa kung pinipitik din ba sila ng guro. Sa sobrang trauma, nagkakaroon na raw ng bangungot si Aaron tuwing natutulog, at nagigising na umiiyak dahil iniisip niyang napapagalitan siya ng kanyang guro.
Ang kwento ni Aaron ay isang paalala sa lahat na ang mga unang karanasan ng bata sa paaralan ay napakahalaga. Dapat itong punuin ng saya, pagtuturo, at pagmamahal, hindi takot at trauma. Ang pagiging guro ay higit pa sa pagtuturo ng leksyon ito ay responsibilidad na magbigay ng gabay at pag-aaruga sa murang isipan. Sa halip na parusa, pasensya at malasakit ang tunay na susi upang ma-inspire ang mga bata sa kanilang pag-aaral.
Walang komento:
Mag-post ng isang Komento