Muling naging kontrobersyal ang dating presidential spokesperson na si Harry Roque matapos niyang tawagin si Pangulong Ferdinand “Bongbong” Marcos Jr. na isang “lame duck” o lider na wala nang kapangyarihang pulitikal, sa gitna ng 2025 midterm elections.
Sa isang matapang na social media post noong Martes ng gabi, naglabas ng komentaryo si Roque kasunod ng partial senatorial results kung saan tatlo sa Top 12 na kandidato ay inendorso ni dating Pangulong Rodrigo Duterte, ang kanyang dating amo.
“‘Di man kandidata si Junior, nawala pa rin ang mga pangil niya! Heto na ang tunay na lame duck na presidente!” ani Roque.
Ayon sa ilang political analysts, ang salitang “lame duck” ay tumutukoy sa isang lider na wala nang malinaw na kapangyarihan o suporta mula sa publiko at gobyerno, kahit nasa puwesto pa. Sa pananaw ni Roque, tila nawawala na raw ang bisa ng pamumuno ni Marcos Jr. matapos mabigo ang karamihan sa kanyang mga kaalyado sa eleksyon.
Hindi rin pinalampas ng Malacañang ang pahayag ni Roque. Ayon kay Presidential Communications Press Officer Claire Castro, kung talagang wala nang saysay ang administrasyon, dapat bumalik si Roque sa Pilipinas at harapin ito.
“Kung lame duck ang pangulo at parang balewala na ang administrasyon, dapat bumalik siya kaagad dito,” saad ni Castro sa isang press briefing nitong Miyerkules.
Sa kasalukuyan, si Roque ay nasa Netherlands kung saan humihingi siya ng political asylum, sa gitna ng umano’y political persecution na nararanasan niya sa Pilipinas. Hindi pa malinaw kung may pormal na kaso siyang kinakaharap, ngunit nananatili siyang aktibo sa social media sa pagbibigay ng komentaryo sa kasalukuyang administrasyon.
“Hindi ako mananahimik kung nakikita kong walang direksyon ang pamumuno. Bilang isang Pilipino, may karapatan akong magsalita—kahit nasa labas ako ng bansa,” — Harry Roque, sa panayam mula Netherlands
Walang komento:
Mag-post ng isang Komento