Habang rumaragasa ang tubig-baha dulot ng Bagyong Tino, isang 13-anyos na bata na si Mark Christian ang naging simbolo ng kabayanihan at pagmamahal. Sa kabila ng panganib, hindi siya nagdalawang-isip na lusungin ang abot-bewang na tubig upang iligtas ang kanyang dalawang alagang pusa, mga hayop na itinuturing na niyang tunay na pamilya.
Nakayapak, basang-basa, at nanginginig sa lamig, makikita si Mark Christian na mahigpit na niyayakap ang kanyang mga pusa sa dibdib habang tinatahak ang baha na puno ng debris. Sa gitna ng takot at kaguluhan, isa lang ang nasa isip ng bata mailigtas ang kanyang mga alaga.
Nang tanungin ng mga rumespondeng rescuer kung bakit niya nilagay sa panganib ang sarili, buong tapang ngunit may lambing niyang sagot: “Dahil pamilya ko na rin sila.”
Ang simpleng linyang ito ang nagpaiyak sa maraming netizens matapos kumalat ang larawan ni Mark Christian sa social media. Sa panahon ng kalamidad kung saan madalas inuuna ng tao ang sarili, ipinakita ng batang ito ang tunay na diwa ng malasakit at kabayanihan.
Ayon sa mga kapitbahay, matagal nang inaalagaan ni Mark Christian ang kanyang dalawang pusa. Mula nang mamatay ang kanyang ama at umalis ang kanyang ina para magtrabaho sa ibang probinsya, ang mga pusa na raw ang nagsilbing kasama at sandigan niya sa araw-araw.
Ang kwento ni Mark Christian ay isang makabagbag-damdaming paalala na ang kabayanihan ay hindi nasusukat sa edad o lakas, kundi sa kabutihan ng puso. Sa gitna ng kalamidad, ipinakita niya na ang tunay na pamilya ay hindi lang binubuo ng tao kundi ng lahat ng nilalang na minamahal natin.
Walang komento:
Mag-post ng isang Komento