Habang papalapit ang panibagong bagyo sa bansa, kumalat sa social media ang panawagang “If you can’t evacuate with them, please unchain/uncage them.” isang malasakit na mensahe para sa mga alagang hayop na madalas nakakaligtaan tuwing kalamidad.
Ang simpleng paalala na ito ay tumama sa damdamin ng maraming netizens, lalo na ng mga pet lovers at animal welfare advocates na patuloy na nananawagan ng pag-unawa at habag sa mga hayop na walang kakayahang ipagtanggol ang sarili.
Ang mensahe ay malinaw kung hindi mo kayang isama ang iyong alaga sa paglikas, huwag mo silang ikadena o ikulong. Bigyan sila ng pagkakataong lumaban at makaligtas. Ayon sa mga animal rescuers, sa bawat bagyo, libo-libong hayop ang namamatay dahil naiwan silang nakakulong o nakatali habang lumalakas ang ulan at pagtaas ng tubig.
Ayon sa mga organisasyong pang-hayop gaya ng PAWS at Pawssion Project, ang mga alaga ay dapat ituring na miyembro ng pamilya. Katulad ng mga bata at matatanda, sila rin ay nangangailangan ng proteksyon, pagkain, at kaligtasan.
Marami ring netizens ang nagbahagi ng kanilang karanasan, kung paano nila isinama ang kanilang mga aso at pusa sa mga evacuation centers kahit mahirap ang sitwasyon. Ang ilan ay naglakad ng milya-milya para lang masiguro na ligtas ang kanilang mga alaga.
Nag-trending ang nasabing mensahe sa Facebook at X, at umani ng papuri mula sa mga netizens. Marami ang nagsabing ito ay isang simpleng paalala ngunit may malalim na kahulugan, isang wake-up call na dapat seryosohin lalo na sa mga lugar na madalas tamaan ng bagyo.
Ang mensaheng “If you can’t evacuate with them, please unchain/uncage them” ay isang paalala ng tunay na malasakit at responsableng pag-aalaga.
Walang komento:
Mag-post ng isang Komento