Nag-viral sa social media ang naging komento ni Vice Ganda tungkol sa proseso ng pagkuha ng valid ID sa Pilipinas, matapos ang kanyang mapanlikhang banat sa segment na “Masasagot Mo Ba?” ng It’s Showtime.
Nagsimula ang usapan sa tanong na: “Kumpletuhin ang karaniwang nakapaskil sa mga paaralan: ‘No ID, No ______.’” Mabilis itong sinagot ng ABS-CBN entertainment reporter na si MJ Felipe ng “Entry.” Mula dito, nagbiro si Vice pero may halong seryosong punto:
“‘Di ba? Kaya ka nga nagpapagawa ng ID kasi wala kang ID para magkaroon ka ng ID… Kaya hindi ka magkaka-ID sa bansang ito!”
Tinutukoy niya ang sitwasyong kung saan hihingan ka muna ng ibang valid ID bago ka makagawa ng panibagong ID isang sistemang matagal nang reklamo ng maraming Pilipino.
Kasama sa kanyang banat ang mga co-hosts at contestants na natawa pero aminadong may katotohanan sa obserbasyon ng komedyante. Hiyawan at tawanan naman ang madlang pipol sa studio, tanda na marami ang naka-relate sa sitwasyon.
Matapos mag viral, dagsa ang mga komento mula sa netizens na nagbahagi ng kanilang sariling karanasan mula sa paulit-ulit na pagbalik sa opisina, hanggang sa dagdag gastos para makakuha ng ibang identification na kadalasa’y mahirap din makuha. Marami ang sumang-ayon na panahon na para gawing mas simple at accessible ang proseso ng pagkuha ng ID sa bansa.
Ang banat ni Vice Ganda ay nagpatunay na minsan, kailangan lang ng isang matapang at nakakatawang pahayag para maibulalas ang hinaing ng nakararami. Sa kabila ng katatawanan, malinaw ang mensahe: kailangan ng reporma sa proseso ng pagkuha ng ID upang mas maging madali at abot-kaya para sa lahat ng Pilipino.
Walang komento:
Mag-post ng isang Komento