Umabot sa malas na kapalit ang kasikatan ng isang motorcycle rider mula Binondo, Manila matapos siyang gumawa ng stunt at mag-post nito sa TikTok. Nakilala ang rider bilang si “Babiano” o RBabianoTV, na naging viral matapos makitang sumasayaw sa ibabaw ng kanyang motorsiklo habang nasa gitna ng trapik.
“Ang stunt na ito ay malinaw na paglabag sa batas trapiko. Hindi ito nakakatawa at higit sa lahat, delikado. Ang suspensyon ay parusa at babala: ang kaligtasan sa kalsada ay hindi dapat gawing TikTok trend.” -LTO Chief Vigor Mendoza II
Matapos umani ng batikos online, agad na inaksyunan ng Land Transportation Office (LTO) ang insidente. Ayon kay LTO Chief Vigor Mendoza II, sinuspinde ng ahensya ang lisensya ni Babiano sa loob ng 90 araw, kasabay ng babala na maaari pa siyang kasuhan ng reckless driving at posibleng permanenteng mabawi ang kanyang lisensya.
Ang opisyal na violation na ibinigay kay Babiano ay “Improper person to operate a motor vehicle.” Isang show cause order na rin ang naipadala, at itinakda ang kanyang pagdinig sa Agosto 20.
Kaugnay nito, humingi na ng paumanhin si Babiano at agad na binura ang naturang video. Gayunpaman, binigyang-diin ni Mendoza na ang parusang ito ay hindi lang para disiplinahin ang rider, kundi bilang babala na ang kaligtasan sa kalsada ay hindi dapat gawing TikTok trend.
Dagdag pa niya, ang hakbang na ito ay bahagi ng mas mahigpit na kampanya laban sa mga lumalabag sa batas trapiko, alinsunod sa direktiba ni Pangulong Ferdinand Marcos Jr.
Ang insidente ng TikTok rider ay nagsilbing malinaw na paalala sa lahat ng motorista na ang kalsada ay hindi entablado ng palabas. Bagama’t maaaring magdala ng kasikatan ang social media, mas mahalaga pa rin ang buhay, kaligtasan, at disiplina sa daan. Ang aksyon ng LTO ay nagpapakita ng seryosong hangarin na linisin ang kalsada mula sa mga iresponsableng motorista at ipaalala na ang responsibilidad sa trapiko ay hindi biro.
Walang komento:
Mag-post ng isang Komento