Ipinagtanggol ng Malacañang nitong Huwebes ang panukalang ₱4.5-bilyong confidential at intelligence funds (CIF) ng Office of the President para sa taong 2026, sa kabila ng mga puna sa laki ng halagang ito. Ayon sa Palace Press Officer na si Claire Castro, makatuwiran ang pondo lalo na’t ang Pangulo ay commander-in-chief at pangunahing tagapag-anyo ng pambansa at panlabas na polisiya.
"Confidential funds are not inherently bad. Ang mahalaga, gamitin ito nang tama at para sa ikabubuti ng bansa. Kapag ginamit ng may malasakit at integridad, ito ay magiging sandata para mapanatiling ligtas ang bawat Pilipino." -Marcos Administration
Paliwanag ni Castro, halos kalahati ng ₱10.77 bilyong CIF sa ilalim ng 2026 National Expenditure Program ay mapupunta sa Office of the President, at mahalaga ang pondo upang matiyak ang seguridad ng bansa.
"Confidential funds are not bad if used properly. They only become wrong when used by someone corrupt," giit ni Castro.
Kasabay nito, hinamon niya ang kampo ni Vice President Sara Duterte na magpaliwanag kaugnay ng umano’y paggamit ng military certifications para bigyang-katwiran ang ₱15 milyong CIF spending noong 2022, na isa sa mga isyung bahagi ng kasalukuyang impeachment case laban sa bise presidente.
Samantala, binigyang-diin ni dating Finance Undersecretary Cielo Magno ang usapin ng moral authority ng Pangulo sa paghiling ng ganito kalaking pondo, lalo na’t sensitibo ang paggamit ng CIF.
Ayon sa 2015 joint circular, ang confidential expenses ay tumutukoy sa surveillance at iba pang operasyon ng civilian agencies, habang ang intelligence expenses naman ay para sa mga gawain ng militar at uniformed personnel na may kaugnayan sa seguridad.
Ang usapin ng confidential at intelligence funds ay nananatiling sensitibo sa publiko, lalo na’t malaki ang halagang nakalaan para rito. Habang ipinagtatanggol ng Malacañang ang kahalagahan nito sa pambansang seguridad, patuloy naman ang panawagan para sa mas malinaw na transparency at accountability sa paggamit ng pondo. Sa huli, ang tiwala ng taumbayan ay nakasalalay sa wastong paggasta at malinaw na paliwanag mula sa mga namumuno.
Walang komento:
Mag-post ng isang Komento