Mainit na usapin ngayon ang pangalan ng beteranang broadcast journalist na si Korina Sanchez matapos masangkot sa post ni Pasig City Mayor Vico Sotto tungkol sa umano’y “P10 milyon bayad” kapalit ng panayam sa mag-asawang Sarah at Curlee Discaya.
“I’m not guilty of anything wrong. Ang trabaho ko ay magbahagi ng kuwento ng tao—hindi man palaging perfect, pero ginagawa namin ito nang may integridad at katapatan. Hindi ko kailanman ipagpapalit ang kredibilidad na pinaghirapan ko ng buong buhay.” -Korina Sanchez
Sa kanyang social media account, magkahalong seryoso at may halong pabirong tono ang mga sagot ni Korina sa ilang netizens na nagtanong kung siya nga ba ang tinutukoy ng alkalde. Ayon kay Korina, wala siyang ginawang mali at malinaw na hindi siya “guilty” sa mga paratang.
Isa sa mga tanong ng publiko ay kung bakit biglang nawala ang interview ni Korina kay Sarah Discaya sa YouTube. Nilinaw ni Korina na desisyon iyon ng kanyang production team at wala itong kinalaman sa pera o anumang anomalya.
Dagdag pa niya, ang layunin ng kanyang programa ay magbahagi ng mga “life stories” at hindi investigative journalism. Sa kaso ng Discaya couple, itinampok daw ang kanilang “success story” bilang bahagi ng serye ng kwento ng iba’t ibang personalidad.
Noong Agosto 21, 2025, nag-post si Mayor Vico ng patama sa mga “kilalang journalists” na pumapayag umanong magpa-interview sa mga contractors na papasok sa politika kapalit ng malaking halaga.
Kahit hindi siya pinangalanan, kalakip ng post ang screenshots ng interviews nina Julius Babao at Korina Sanchez, dahilan para umani ng intriga at panibagong tanong tungkol sa kredibilidad ng media.
Sa kabila ng mga paratang at intriga, nanindigan si Korina Sanchez na wala siyang nilabag at hindi siya nagpabayad para sa panayam sa Discaya couple. Ang pangyayaring ito ay muling nagbukas ng diskusyon tungkol sa integridad ng media, lalo na kung sangkot ang mga personalidad na may kaugnayan sa pulitika at malalaking proyekto ng gobyerno.
Walang komento:
Mag-post ng isang Komento