Isang matapang na panukala ang inilabas ni Akbayan Party-list Rep. Chel Diokno: bigyan ng hero’s recognition ang lahat ng biktima ng drug war ng Duterte administration. Para kay Diokno, hindi dapat manatiling tahimik o nakalimutan ang libo-libong buhay na nawala at pamilya na nawasak dahil sa madugong kampanyang ito.
“Panahon na para kilalanin natin ang mga biktima ng war on drugs bilang mga bayani. Hindi sila dapat tratuhing kriminal biktima sila. Ang kanilang kwento ay dapat nating ipaglaban at itala sa kasaysayan.” -Rep. Chel Diokno
Ayon kay Diokno, matagal nang panahon para tuwirang kilalanin ang mga biktima bilang bahagi ng masakit na kasaysayan ng bansa. Hindi raw sapat na hingan lamang sila ng paumanhin dapat silang bigyan ng pormal na pagkilala, respeto, at puwang sa alaala ng sambayanan.
Iginiit ni Diokno na kailangang maitatag ang isang National Memorial for Drug War Victims upang hindi na maulit ang ganitong uri ng karahasan. Dapat din umanong magkaroon ng tulong para sa mga naiwang pamilya, lalo na yaong mga nawalan ng breadwinner at napilitang isugal ang kinabukasan dahil sa biglaang pagkawala ng mahal sa buhay.
Para sa kanya, ang tunay na bayani ay hindi lang iyong nasa entablado o nasa posisyon kundi pati iyong mga inosenteng nabuwal dahil sa pang-aabuso ng kapangyarihan.
Diretso ang mensahe ni Rep. Chel Diokno: hindi matatapos ang sugat ng bansa hangga’t hindi kinikilala at binibigyang-hustisya ang mga biktima ng war on drugs. Sa pagnanais niyang maglaan ng pormal na pagkilala, tinutulak niya ang Pilipinas tungo sa isang mas makatao at makatarungang kinabukasan.
Walang komento:
Mag-post ng isang Komento