Actor-host Matteo Guidicelli ay naglabas ng panawagan sa pamahalaan matapos niyang makita ang mabagal na pagdating ng tulong sa mga komunidad na labis na naapektuhan ng Bagyong Tino, partikular sa kanyang lalawigan sa Liloan, Cebu.
Sa isang post sa social media, ibinahagi ng aktor ang video footage mula sa ground zero ng kalamidad kung saan makikita ang labis na pinsalang dulot ng bagyo mga bahay na winasak, mga pamilyang nawalan ng tahanan, at mga mamamayang hirap makakuha ng malinis na tubig.
“Right now, their most urgent need is WATER. That’s what they are pleading for. We need more attention. We need faster action” -Matteo Guidicelli
Ayon kay Matteo, ilang araw matapos ang bagyo ay hindi pa agad nakarating ang tulong mula sa pamahalaan, kaya napilitan ang mga lokal na residente at volunteers na magpatrolya mismo sa kanilang mga barangay upang tumulong sa mga kapitbahay at kamag-anak.
Binanggit din ng aktor na higit sa 100 buhay ang nasawi sa pananalasa ng bagyo, kabilang ang maraming residente ng Barangay Cotcot sa Liloan. Ayon kay Matteo, kailangan ng mabilis na aksyon at pangmatagalang plano para matulungan ang mga biktima sa pagbangon at muling pagtatayo ng kanilang mga tahanan.
Sa kanyang mensahe, hinamon ni Matteo ang mga opisyal ng gobyerno na maging tapat at maagap sa pagtugon sa ganitong uri ng kalamidad. Binanggit niya ang paulit-ulit na suliranin sa mga substandard flood control projects at kakulangan ng maayos na imprastruktura sa mga lugar na laging tinatamaan ng bagyo.
Ang panawagan ni Matteo Guidicelli ay sumasalamin sa hinaing ng maraming Pilipino na paulit-ulit na biktima ng mabagal at minsang hindi epektibong pagtugon ng gobyerno tuwing may kalamidad. Habang patuloy na bumabangon ang mga apektadong komunidad, nananatiling malinaw ang mensahe ng aktor, hindi dapat hintayin ang susunod na trahedya bago kumilos.
Walang komento:
Mag-post ng isang Komento