Hindi napigilan ni Ferdinand Dela Merced, o mas kilala bilang Philippine Looper, ang kanyang galit at pagkadismaya matapos ideklara ng Sangguniang Panlalawigan ng Negros Oriental na siya ay persona non grata sa kanilang probinsya. Ang deklarasyon ay bunsod ng kanyang mga pahayag sa social media na umano’y walang respeto sa mga lokal na opisyal sa gitna ng paghahanda sa Bagyong Tino.
Sa kanyang reaksyon, ipinaliwanag ni Dela Merced na wala siyang masamang intensyon, at nais lang niyang ipahayag ang kanyang opinyon bilang isang bisita. Ayon sa kanya, hindi niya sinisisi ang mga opisyal, ngunit nais lamang niyang ipunto ang tamang pakikitungo sa mga bisita kahit sa panahon ng abala.
“Gaano ba ka simple ang gusto kong ipahiwatid, may bagyo man o wala pag may bisita, dapat nasa tama. Ganun lang kasimple,” -Philippine Looper Ferdinand Dela Merced
Dagdag pa niya, labis niyang ikinagulat ang naging desisyon ng Negros Oriental, dahil para sa kanya ay wala naman siyang ginawang pambabastos.
Sa halip na humupa ang galit, lalo pang umigting ang sentimyento ng mga taga-Negros Oriental matapos ang bagong pahayag ng Looper. Ayon sa kanila, tila walang pagsisisi si Dela Merced at ipinagpipilitan pa rin ang kanyang punto kahit malinaw na abala ang LGU sa paghahanda sa kalamidad.
Marami rin ang nagsabing dapat ay mas naging maunawain si Dela Merced bilang isang influencer, dahil ang kanyang mga salitang binibitawan ay may epekto sa reputasyon ng mga tao at lugar na kanyang binibisita. Sa kabila ng isyung bumabalot, nanindigan si Vice Governor Fritz Diaz at ang buong konseho ng Negros Oriental sa kanilang pasya.
Ang isyu sa pagitan ng Philippine Looper at Negros Oriental ay nagsilbing paalala sa lahat, lalo na sa mga kilalang personalidad sa social media, na ang bawat salita ay may bigat. Hindi sapat ang katanyagan upang ipilit ang gusto, lalo na kung ito ay sa gitna ng kalamidad at sakuna.
Walang komento:
Mag-post ng isang Komento