Inilahad ni Senator Imee Marcos na ang tinutukoy ni Senate Blue Ribbon Committee Chairperson Ping Lacson bilang “very important witness” sa imbestigasyon ng maanomalyang flood control projects ay walang iba kundi ang kanyang pinsan, si dating House Speaker Martin Romualdez.
Ngunit ayon sa senadora, hindi na umano dadalo si Romualdez sa nakatakdang pagdinig sa Nobyembre 14, dahil umano sa pagkahiya sa isyu. Sa isang matapang na pahayag, sinabi ni Imee, “Kasi ang dating naririnig ko, magiging star witness at bibigyan ng witness protection. Puwede ba ‘yun? Niloloko na tayo nang lubusan.”
Ang komento ng senadora ay agad na naging mainit na usapan sa social media, dahil tila nagpapakita ito ng tensyon sa loob ng pamilya Marcos-Romualdez, na kilala sa matibay na alyansa sa politika.
Ang naturang isyu ay may kaugnayan sa mga umano’y anomalya sa flood control projects, kung saan sinasabing may mga kickbacks at overpricing na naganap. Ayon sa dokumento ng Office of the City Prosecutor ng Quezon City, nakatakdang humarap sa preliminary investigation si Romualdez kaugnay ng reklamo.
Gayunman, mariing itinanggi ni Martin Romualdez ang mga akusasyon, sinasabing walang katotohanan ang mga paratang laban sa kanya at isa lamang itong political smear campaign na layuning sirain ang kanyang reputasyon.
Sa panayam, ipinahayag ni Sen. Marcos ang kanyang pagkadismaya sa diumano’y pagtrato sa nasabing kaso. Ayon sa kanya, tila may pagtatangka umanong protektahan ang ilang mataas na opisyal sa likod ng isyu.
“Hindi ko maintindihan kung bakit parang pinoprotektahan pa ang mga sangkot. Ang taumbayan na ang niloloko dito,” matapang na saad ng senadora.
Dagdag pa niya, hindi siya mananahimik sa isyung ito kahit sino pa ang sangkot. “Kahit kamag-anak ko pa ‘yan, kung may kasalanan, dapat managot. Ang serbisyo publiko, hindi dapat ginagamit para sa pansariling interes,” aniya.
Ang rebelasyong ito ni Senator Imee Marcos ay nagbigay ng bagong anggulo sa isyu ng flood control project anomaly na kasalukuyang iniimbestigahan ng Senado. Habang iginiit niyang hindi siya magbubulag-bulagan kahit sino pa ang sangkot, nananatiling tanong sa publiko kung paano haharapin ng pamahalaan ang isyung ito nang walang pinapanigan.
Walang komento:
Mag-post ng isang Komento