Labis ang pasasalamat ng mga residente ng Polangui, Albay sa Xentro Mall, matapos nitong buksan ang kanilang establisyemento bilang evacuation center para sa mga evacuees mula sa Barangay Ubaliw bilang paghahanda sa pagdating ng Bagyong Uwan (Fung-wong). Habang patuloy na tumataas ang antas ng babala sa lalawigan, nagbigay ng ligtas at komportableng masisilungan ang naturang mall para sa mga pamilyang apektado ng bagyo.
Bago pa man maramdaman ang lakas ng hangin at ulan, nagdesisyon ang pamunuan ng Xentro Mall Polangui na gawing pansamantalang evacuation site ang ilang bahagi ng kanilang gusali. Ayon sa mga tauhan ng mall, agad nilang inihanda ang open spaces at event areas upang matugunan ang pangangailangan ng mga residente.
May mga inilatag na banig, kumot, at drinking stations, habang nagpaabot din ng relief goods at pagkain ang mga lokal na negosyante sa loob ng mall.
Ayon sa mga evacuees, ramdam nila ang malasakit at mas nakahinga sila ng maluwag dahil sa kaligtasang ibinigay ng Xentro Mall.
“Hindi namin akalaing ganito kaayos dito. Malamig, may kuryente, at higit sa lahat, ligtas kami,” - evacuees
Batay sa PAGASA advisory, nasa ilalim ng Tropical Cyclone Wind Signal No. 2 ang lalawigan ng Albay, kabilang ang bayan ng Polangui. Dahil dito, pinayuhan ng local government unit (LGU) ang mga residente na nakatira sa flood-prone at landslide-prone areas na lumikas agad sa mas ligtas na lugar.
Ang tulong ng Xentro Mall ay nakatulong nang malaki upang maiwasan ang siksikan at kakulangan ng espasyo sa mga pampublikong evacuation centers.
Matapos mag-viral ang mga larawan ng evacuees sa loob ng mall, bumuhos ang papuri at pasasalamat ng mga netizens. Marami ang nagsabing sana lahat ng mall at pribadong establisyemento ay tularan ang ginawa ng Xentro Mall, lalo na sa panahon ng kalamidad.
Ang Xentro Mall Polangui ay nagsilbing simbolo ng modernong bayanihan, kung saan ipinakita ng isang pribadong kompanya na sa panahon ng kalamidad, ang tunay na sukatan ng tagumpay ay hindi kita kundi kabutihan.
Walang komento:
Mag-post ng isang Komento