Isinusulong ngayon ni Senador Panfilo "Ping" Lacson ang isang panukalang batas na naglalayong bigyan ng legal na proteksyon ang mga matatandang magulang laban sa kapabayaan o pag-abandona ng kanilang mga anak.
“Hindi lang ito tungkol sa legal na responsibilidad. Ito ay paalala na ang pamilya ang pundasyon ng ating lipunan. Kung kaya nating tumulong sa iba, mas lalo nating dapat alagaan ang ating sariling mga magulang.” -Sen. Ping Lacson
Ang nasabing panukala ay pinamagatang Parents Welfare Act of 2025. Sa ilalim nito, magiging obligasyon ng bawat anak na tiyakin ang kapakanan ng kanilang mga magulang, lalo na kung sila ay matanda na, may sakit, o wala nang kakayahang alagaan ang sarili.
Ayon kay Lacson:
“Tayong mga Pilipino ay kilala sa pagiging malapit sa pamilya. Pero sa kabila nito, marami pa ring matatanda ang naiiwang mag-isa at pinapabayaan ng kanilang sariling anak.”
Dagdag pa niya:
“Ang panukalang batas na ito ay naglalayong palalimin pa ang ating responsibilidad bilang anak at gawing isang criminal offense kung mapatunayang pinabayaan ang magulang na nangangailangan ng tulong.”
Ano ang Laman ng Panukala?
Ang sinumang anak na hayagang nagpapabaya o nag-aabandona sa kanilang magulang na nangangailangan ng suporta ay maaaring makasuhan.
Maaaring magsampa ng kaso ang magulang laban sa anak kung sila ay tinanggihan o pinabayaan.
Layunin ng batas na mapanatili ang kultura ng malasakit at pag-aalaga sa mga magulang.
Sa paglaganap ng mga kaso kung saan ang matatandang magulang ay naiiwang mag-isa o ginagawang palaboy sa lansangan, malinaw na may pangangailangan para sa mas matibay na batas upang maprotektahan ang kanilang karapatan at kapakanan.
Ang panukalang Parents Welfare Act of 2025 ay hindi lamang usapin ng batas, ito ay paalala na hindi natatapos ang responsibilidad ng anak kapag sila'y nagka-sariling buhay na.
Walang komento:
Mag-post ng isang Komento