Halos hindi na raw makatulog si Angelika Dela Cruz matapos matanggap ang isang sulat ng pagbabanta sa kanyang buhay na may kasamang tatlong bala, na malinaw na mensahe para siya ay umatras sa kanyang kandidatura bilang Vice Mayor ng Malabon City.
Sa Facebook post ng aktres ngayong Huwebes, ipinakita niya ang larawan ng sulat kung saan nakasaad ang malagim na babala:
“Umatras ka na sa laban ng Vice Mayor ng Malabon… Kung hindi, alam mo ang kahihinatnan mo at ng pamilya mo.”
Hindi napigilang maglabas ng saloobin si Angelika:
“Siniraan, kinasuhan, ngayon tinatakot. Ano’ng kasunod?!! Grabe na pati family ko dinadamay ninyo.”
Ang tinutukoy niya ay ang mga legal na kasong isinampa laban sa kanyang kandidatura ng ilan sa kanyang mga katunggali sa politika. Ngunit sa halip na matakot, nanindigan si Angelika na hindi siya uurong.
“Hindi ako matitinag sa pananakot. Hindi ito tungkol sa akin lang — ito ay laban para sa mga taga-Malabon na karapat-dapat sa maayos at tapat na serbisyo. Hindi ako uurong.” - ANGELIKA DELA CRUZ
Habang palapit nang palapit ang halalan, lalong umiinit ang tensyon sa lokal na politika. Ngunit ang pagbabanta ng buhay ay isang linya na hindi kailanman dapat tawirin. Sa kabila ng panganib, matatag pa rin ang loob ni Angelika Dela Cruz — isang ina, isang lingkod bayan, at isang babae na hindi basta-basta sumusuko.
“Hindi bala ang magpapatahimik sa akin, kundi ang pagmamahal sa bayan ang magtutulak para ituloy ang laban.”
Walang komento:
Mag-post ng isang Komento