Sa kabila ng hindi matagumpay na pagbabalik sa Senado sa katatapos na 2025 midterm elections, Manny Pacquiao — ang tinaguriang Pambansang Kamao — ay muling babalik sa boxing ring upang ipagpatuloy ang kanyang legacy sa isports.
Opisyal nang kinumpirma ni Pacquiao na babalik siya sa laban ngayong Hulyo kontra sa mas batang Amerikanong boksingero na si Mario Barrios, para sa WBC welterweight title. Ito ay magiging unang laban ni Pacquiao matapos ang apat na taong pagreretiro mula sa propesyonal na boxing.
Ayon sa ulat, magaganap ang laban sa Las Vegas, ilang linggo matapos siyang tanggapin bilang inductee sa International Boxing Hall of Fame ngayong Hunyo—isang malaking karangalan para sa isang atleta.
Sa isang mensahe sa kanyang mga tagasuporta, nagpasalamat si Pacquiao sa mga naniniwala sa kanya sa kabila ng kanyang pagkatalo sa pagtakbo bilang senador.
“Mula sa aking puso, maraming salamat. Hindi man ako nagtagumpay sa pagtakbo sa Senado, lubos ang aking pasasalamat sa bawat boto, dasal, at suporta,” aniya.
Bagama’t bigo sa pulitika, iginiit ni Pacquiao na mananatili ang kanyang pagmamahal at pangarap para sa mga Pilipino.
“Ang puso ko ay mananatiling nasa bayan. At ang pangarap ko para sa bayan na maiahon ang bawat pamilyang Pilipino ay hindi magbabago.”
Muling pinatunayan ni Manny Pacquiao na ang pagkatalo ay hindi katapusan, kundi simula ng panibagong laban. Sa kanyang pagbabalik sa boxing ring, dala niya hindi lang ang hangarin na manalo, kundi ang inspirasyon na ipagpatuloy ang laban para sa bayan, sa kanyang sariling paraan.
Walang komento:
Mag-post ng isang Komento