Hindi nagpaapekto si Mamamayang Liberal (ML) Party-list Representative-elect at dating Senador Leila de Lima sa resulta ng Pulse Asia survey na nagsasabing 50% ng mga Pilipino ay tutol sa impeachment ni Vice President Sara Duterte.
“Hindi ito popularity contest. May proseso ang batas, at doon kami nakabase. Kung may kasalanan, kailangang managot.” - Rep. Leila de Lima
Sa isang panayam sa Super Radyo DZBB nitong Martes, Mayo 27, sinabi ni De Lima na ang kanilang desisyon bilang bahagi ng House prosecution panel ay hindi nakabase sa opinyon ng survey kundi sa katotohanang ilalantad sa mismong impeachment trial.
“Wala pong epekto ‘yun. Para sa akin, at sa tingin ko rin sa mga kasama ko sa prosecution panel, hindi kami magpapadala sa surveys na ganyan,” ani De Lima.
Ayon kay De Lima, maaga pa raw upang sukatin ang tunay na saloobin ng publiko, lalo't hindi pa naman nagsisimula ang aktuwal na paglilitis.
“'Yung totoong magiging public opinion rito ay habang tumatakbo ang impeachment proceedings,” paliwanag ng dating Justice Secretary.
“Doon lalabas kung may bigat ang mga ebidensya namin laban kay VP Sara.”
Batay sa Pulse Asia survey na isinagawa mula Mayo 6-9, lumabas na:
50% ang hindi sang-ayon sa impeachment.
28% ang sang-ayon sa hakbang ng mahigit 200 kongresista na bumoto para impeach si VP Sara noong Pebrero 5.
Ngunit iginiit ni De Lima na tulad sa eleksyon, hindi palaging tumutugma ang survey sa aktuwal na resulta.
“Tulad sa halalan, may surveys. Pero nakita naman natin—madalas, hindi 'yan tugma sa tunay na boto ng taumbayan,” ani De Lima.
Habang papalapit ang impeachment proceedings kay VP Sara Duterte, malinaw sa mga miyembro ng prosecution panel gaya ni Rep. Leila de Lima na hindi sila matitinag sa opinyon ng survey lamang. Ang magiging hatol, aniya, ay nakadepende hindi sa numero kundi sa ebidensya.
Walang komento:
Mag-post ng isang Komento