Naghain ng motion to remain si dating Bamban Mayor Alice Guo sa Pasig City Regional Trial Court (RTC) Branch 167 upang payagan siyang manatili sa Pasig City Jail Female Dormitory imbes na ilipat sa Correctional Institution for Women sa Mandaluyong. Ayon sa kanyang legal team, mas ligtas umano si Guo sa kasalukuyang kulungan at mas nababantayan doon ang kanyang kalagayan.
“Hindi ito simpleng kahilingan. Ang layunin ng mosyon ay protektahan ang kanyang buhay at kaligtasan habang nagpapatuloy ang proseso ng hustisya.” -Legal Counsel ni Alice Guo
Ipinunto ng kampo ni Guo na sa Pasig City Jail, limitado ang bilang ng mga detainees at mas mahigpit ang seguridad. Bukod dito, nag-aalala umano ang dating alkalde sa posibleng panganib sa kanyang kaligtasan sakaling mailipat siya sa mas malaking pasilidad tulad ng correctional facility.
Sa kabilang banda, kinumpirma ng Department of Justice (DOJ) na sinusuri nila ang kahilingan ni Guo. Bagaman karaniwan nang inililipat sa correctional facility ang mga babaeng detainees, maaari raw itong baguhin batay sa kalagayang pangkaligtasan o espesyal na konsiderasyon ng korte.
Ang mosyon ni Alice Guo na manatili sa Pasig City Jail ay nagbubukas ng panibagong diskusyon tungkol sa karapatan ng mga akusado sa kaligtasan at patas na pagtrato habang dinidinig ang kanilang mga kaso.
Walang komento:
Mag-post ng isang Komento