Matapos ang malagim na pananalasa ng Bagyong Tino na nagdulot ng higit isang daang nasawi at libu-libong nawalan ng tirahan sa Cebu, muling nabuksan ang mainit na usapin tungkol sa upland development projects lalo na ang kontrobersyal na The Rise at Monterrazas na pinamumunuan ng dating Pinoy Big Brother winner at engineer na Slater Young, kasama ang kanyang asawang vlogger at influencer na si Kryz Uy.
Ayon sa mga residente ng mga kalapit-barangay, napansin nila ang biglaang pagragasa ng tubig at putik mula sa kabundukan habang tumatama ang bagyo. Marami ang nag-post sa social media ng kanilang mga karanasan, kabilang ang isang viral na komento:
“Kami ang taga-baba, kami ang nalulunod. We prepared for the typhoon. What we didn’t prepare for was the sudden rush of water from the mountain.”
Ang proyekto, na nakapwesto sa isang mataas na bahagi ng lungsod, ay matagal nang tinitingnan bilang posibleng dahilan ng mabilis na pagbaha sa mga mababang lugar, partikular sa mga barangay na nasa paanan ng Monterrazas.
Bagama’t nanatiling tahimik si Kryz Uy matapos ang bagyo, nagsalita naman si Slater Young sa isang panayam at ipinaliwanag na legal at planado nang mabuti ang proyekto.
“May mga detention ponds at water management systems kami na ginawa para maiwasan ang sobrang runoff ng tubig. Lahat ng ginagawa namin ay alinsunod sa zoning laws ng Cebu City. Residential area ito, at hindi protected forest,” paliwanag ni Slater.
Gayunpaman, hindi pa rin napawi ang agam-agam ng ilan. Ayon sa ilang lokal na environmental groups, kahit may mga structural measures, hindi pa rin sapat ito kung ang topograpiya ay binago nang malaki at kung may kakulangan sa wastong drainage connection sa mga mababang lugar.
Samantala, iginiit ng mga residente na ang kanilang paghingi ng paliwanag ay hindi para manira, kundi para magsilbing babala at panawagan para sa accountability.
Ang kontrobersya sa Monterrazas de Cebu ay nagpapakita ng mas malalim na problema sa urban planning at environmental accountability sa bansa. Habang patuloy ang pagtuturo ng sisi, mahalagang ang mga imbestigasyon ay base sa ebidensya at hindi lamang sa emosyon.
Walang komento:
Mag-post ng isang Komento