Matapos ang sunod-sunod na paglabas niya sa social media bilang isa sa mga pinakaaktibong showbiz personalities na nagbibigay ng opinion sa mga isyung pampulitika, opisyal nang inihayag ni Anjo Yllana ang kanyang intensyon na tumakbo bilang senador sa darating na halalan sa 2028.
Ayon sa dating aktor at TV host, handa na siya sa mas seryosong landas ng serbisyo publiko at naniniwala siyang ito na ang tamang panahon upang gamitin ang kanyang boses para sa mga Pilipino. Sa kanyang pahayag, malinaw na sinabi ni Anjo na nais niyang tumakbo sa ilalim ng Duterte bloc, dahil hindi siya sang-ayon sa kasalukuyang pamamalakad ng administrasyong Marcos.
“Handa na ako. Matagal ko nang pinag-isipan ito. Kung bibigyan ng pagkakataon, gusto kong tumakbo bilang senador sa ilalim ng Duterte bloc. Naniniwala ako sa kanilang prinsipyo at pamumuno, at sa paniniwala nilang dapat inuuna ang tao, hindi politika,” ani ni Anjo sa isang panayam.
Dagdag pa niya, wala siyang tiwala sa kasalukuyang direksyon ng bansa sa ilalim ng pamahalaan ni Pangulong Ferdinand Marcos Jr., at gusto niyang maging boses ng mga Pilipinong nadidismaya sa kasalukuyang sistema.
“Marami akong nakikitang mali. Ang daming pangako pero kaunti ang resulta. Ayokong manood lang. Gusto kong maging bahagi ng solusyon. Hindi ako takot magsalita, lalo na kung para sa bayan,” dagdag ni Anjo.
Ayon kay Anjo, hindi siya tradisyunal na politiko, at ito raw ang gusto niyang baguhin sa Senado, ang kultura ng pamumulitika at pansariling interes. Nais niyang itaguyod ang mga batas para sa proteksyon ng mga manggagawa, pagpapalakas ng edukasyon, at transparency sa paggamit ng pondo ng bayan.
Ang anunsyo ni Anjo Yllana ay nagpatunay na seryoso na ang kanyang intensyon sa larangan ng politika. Mula sa entablado ng showbiz hanggang sa senaryo ng Senado, malinaw na gusto niyang gamitin ang kanyang impluwensya upang ipaglaban ang mga isyung matagal nang kinikimkim ng mga Pilipino.
Walang komento:
Mag-post ng isang Komento