Nagulat ang maraming tagahanga nang ianunsyo ng aktor na si Pepe Herrera ang kanyang pag-alis bilang celebrity contestant sa ABS-CBN show na “Your Face Sounds Familiar.”
“Simula 13 years old pa lang ako, nilalabanan ko na ang depresyon at anxiety. Ginagamit ko ang pagpapatawa bilang sandata, pero hindi ko alam na unti-unti pala akong nasisira sa loob,” -Pepe Herrera
Ayon kay Pepe, matagal na niyang dinadala ang matinding depresyon at anxiety, at ngayong muli itong bumigat, napagpasyahan niyang unahin ang kanyang kalusugang pangkaisipan bago pa lumala ang kanyang kondisyon.
Sa opisyal na pahayag na inilabas ng programa sa kanilang Facebook page, ibinahagi ni Pepe na “Decades na akong hindi okay.”
Aniya, kamakailan lang niya lubusang naunawaan kung gaano kabigat ang kanyang pinagdadaanan isang damdaming matagal na niyang tinatago sa likod ng mga ngiti at pagpapatawa.
Ayon kay Herrera, isa sa mga pinakamahirap na desisyon sa kanyang buhay ang pag-alis sa show, lalo’t matagal niyang pinangarap na makasali rito. Ngunit matapos ang serye ng panic attacks sa gabi, kawalan ng tulog, at matinding pananakit ng katawan, napagtanto niyang kailangan niyang pumili sa pagitan ng trabaho at kalusugan.
Ang desisyon ni Pepe Herrera na iwan pansamantala ang entablado ay hindi senyales ng kahinaan, kundi isang hakbang ng katapangan at katinuan. Sa panahon kung saan madalas isantabi ng mga tao ang kanilang nararamdaman para lamang magpatuloy, ipinakita ni Pepe na ang tunay na lakas ay ang pagkilala na kailangan mong huminto para gumaling.
Walang komento:
Mag-post ng isang Komento