Muling pinatunayan ni Baron Geisler na posible ang pagbabago kung may tunay na pagsisikap at pagnanais na maging mas mabuting tao. Sa isang kamakailang panayam, buong puso niyang ibinahagi kung gaano kalaki ang naging pagbabago sa kanyang propesyonal na buhay matapos ang mga kontrobersiyang pinagdaanan niya noong mga nakaraang taon.
“Ang pinakagusto ko ngayon, hindi na natatakot sa akin yung mga co-stars ko. May respeto na akong nararamdaman sa production, kasi hindi na ako nali-late. Best foot forward, dapat alam ko yung lines ko, prepared ako at nakikita nila yon,” ani Baron.
Aminado si Baron na dumaan siya sa mga panahong puno ng pagkakamali at maling desisyon, ngunit ngayon ay natutunan na niyang pahalagahan ang disiplina, respeto, at propesyonalismo.
“So first time kong naramdaman yung gano’n na love, support, and respect from peers and co-stars,” dagdag niya.
Ang aktor, na matagal nang naging usap-usapan dahil sa mga kontrobersiya at isyu sa pag-uugali, ay ngayon ay tumutulong na ring magbigay inspirasyon sa mga kabataan at kapwa artista tungkol sa pagbangon at pagbabago. Sa bawat proyekto raw na kanyang tinatanggap, sinisiguro niyang ibinibigay niya ang pinakamagandang bersyon ng kanyang sarili.
Ang pagbabalik ni Baron Geisler ay hindi lamang tungkol sa pagiging aktor, ito ay patunay ng pagbabagong puspos ng determinasyon at kababaang-loob. Mula sa mga pagsubok, natutunan niyang ang respeto ay hindi hinihingi, kundi pinagtatrabahuhan.
Ang kanyang kwento ay inspirasyon sa mga taong gustong magsimula muli, isang paalala na hindi huli ang lahat para sa mga gustong magbago.
Walang komento:
Mag-post ng isang Komento