Hindi na bago sa mga taga-Metro Manila ang pagbaha tuwing umuulan. Pero sa likod ng paulit-ulit na problema, isang nakakabahalang katotohanan ang isiniwalat ng Marcos Administration: 70% ng drainage system sa Metro Manila ay barado na.
Ayon sa opisyal na pahayag, gumagana naman ang mga pumping stations, subalit walang saysay ito kung hindi makadaloy ang tubig baha papunta sa mga istasyong ito. Ang pangunahing dahilan? Lumang-luma at punong-puno ng bara ang mga drainage system.
“Gumagana po yung pumping stations. Ang problema lang po, hindi makadaloy yung tubig-baha papunta sa pumping stations because nga po yung mga drainage system, hindi adequate na para mag-convey ng floodwaters,” ayon sa pahayag ng administrasyon
Bukod sa baradong daluyan ng tubig, ang mismong disenyo ng drainage system ay hindi na sapat sa kasalukuyang dami ng ulan, lalo’t matagal na itong hindi na-a-update. Ang huling assessment ay nagsabing silted o punong-puno na ng buhangin, basura, at latak ang mga daluyan ng tubig.
Sa ngayon, inihayag ng gobyerno na may bagong drainage system master plan na ginagawa sa tulong ng World Bank (WB). Habang ito ay isinasapinal pa, may mga kasalukuyang hakbang na ginagawa tulad ng:
Rehabilitasyon ng mga pumping stations
Paglilinis ng mga floodwater inlets mula sa basura
Pasig-Marikina Floodway Program, para pigilang umagos ang tubig-baha mula sa Sierra Madre papasok sa Metro Manila
“Tila taon-taon na lang, ganito pa rin. Pero umaasa kami na sana, sa wakas, may totoong solusyon na. Hindi sapat ang siling-saglit na hakbang kailangan ng long-term na plano,” ayon kay Mang Ruben, isang residente ng Marikina na ilang beses nang nabaha ang bahay. -
Ang pagbaha ay hindi lang simpleng abala ito ay banta sa buhay, ari-arian, at kabuhayan. Habang mahalaga ang mga pansamantalang hakbang, mas mahalaga ang pangmatagalang solusyon. Kailangan ang tulong ng bawat isa: gobyerno, pribadong sektor, at taumbayan.
Hindi sapat ang teknolohiya kung patuloy pa rin tayong nagtatapon ng basura kung saan-saan. Panahon na para magising ang lahat ang solusyon sa baha ay hindi lang trabaho ng gobyerno, kundi ng buong sambayanan.
Walang komento:
Mag-post ng isang Komento